OEKUSI, 05 Maiu 2026 (TATOLI) – Autoridade iha Rejiaun Administrativa Espesiál Oekusi Ambeno (RAEOA), deside komemorasaun Loron Restaurasaun Independénsia 20 Maiu ba dala-24 iha Oekusi sei konsentra de’it iha sub-rejiaun Pante Makasar, no atividade desportu Komunitária sira adia ba komemorasaun loron Proklamasaun Independénsia 28 Novembru 2026 ne’e.
“Ita-nia tempu badak tebtebes, tan ne’e mak atividade hothotu hanesan desportu komunitária sei adia hotu ba selebrasaun loron Proklamasaun Independénsia 28 Novembru 2026, inklui mós selebrasaun konsentra de’it iha fatin ida iha Pante Makasar,” Prezidente Komisaun Organizadora ba komemorasaun loron Restaurasaun Independénsia 20, Salvadór da Cruz, hateten ba jornalista sira iha salaun administrasaun Numbei, ohin.
Eis-Administradór Oekusi ne’e, informa, desizaun ne’e aprovadu ona iha semana kotuk, bainhira reuniaun ho Prezidente Autoridade RAEOA ba estabelesimentu komisaun organizadora.
“Suku 20 sei konsentra hotu iha Pante Makasar, Autoridade sei apoia transporte hodi mobilidade komunidade sira iha suku sira atu mai partisipa, ne’ebé diferente ho tinan hirak kotuk, bele selebra iha postu administrative, maibé tinan ne’e ita konsentra iha fatin ida de’it,” nia afirma.
Notísia relevante:PA RAEOA interinu orienta instala Komisaun Organiza ba komemorasaun 20 Maiu
Atuál Sekretáriu Rejionál ba Asuntu Finansa ne’e esplika, atividade desportu ne’ebé tuir planu atu realiza iha 20 Maiu mak hanesan, futebol salaun feto no mane, voleibál feto mane, futebol kampu boot, inklui kompetisaun kuda halai taru, ezetu sa’e bua, dada-tali mak bele realiza iha 20 Maiu ne’e.
Nia hateten, orsamentu ba loron nasionál sira, kada tinan aloka kedas bazeia Planu Asaun Anuál, hanesan loron veteranu 03 Marsu, 20 Maiu, 30 Agostu, 12 Novembru, 28 Novembru inklui 31 Dezembru loron nasionál éroi.
“Osan ba loron nasionál mai Oekusi hamutuk rihun $100-resin, maibé ba 20 Maiu agora ne’e, ita seidauk bele informa tanba aban kuarta-feira foin mak enkontru finál, atu aloka orsamentu hira ba loron Restaurasaun ne’e,” nia hateten.
Jornalista: Abílio Elo Nini
Editór: Rafael Ximenes de A. Belo
