OEKUSI, 13 Abríl 2026 (TATOLI) – Prezidente Autoridade Interinu Rejiaun Administrativa Espesiál Oekusi Ambeno (RAEOA), Celestinho Marques, orienta Diretór Diresaun Rejionál sira atu instala ona Komisaun Organizadóra hodi prepara ba komemorasaun loron Restaurasaun Independénsia 20 Maiu ba dala-24 iha Oekusi.
“Ha’u husu ba Diretór Jerál Oekusi ho Diresaun sira hotu, loron Restaurasaun 20 Maiu besik ona, tenke instala ona Komisaun Organizadora, atu halo ona preparasaun ba seremónia ne’e, karik iha ona kompozisaun bele aprezenta mai, se seidauk iha, ha’u fó tempu semana ida, atu instala ona Komisaun Organizadora, depois submete mai, ha’u hasai depaisu nomeiasaun,” nia hateten durante enkontru hamutuk ho Kargu Xefia sira iha salaun Administrasaun Numbei, foin lalais ne’e.
Notísia relevante:PA RAEOA fó konfiansa ba Celestinho Marques lidera Oekusi to’o estrutura definitiva
Nia informa, hafoin nomeasaun, presiza konvoka enkontru, hodi aprezenta planu no programa prioridade sira hodi aposta kedas ho nia orsamentu.
“Ida-ne’e mós Diretór Finansa, presiza haree ona orsamentu ba eventu loron nasionál sira, ita sei enkontru atu aprezenta, hodi fahe kedas, ba loron Restaurasaun 20 Maiu, loron Konsulta Populár 30 Agostu, loron Juventude 12 Novembru, loron Restaurasaun Independénsia 28 Novembru no loron Eroi Nasionál 31 Dezembru, ita fahe no aprova tiha, nune’e Komisaun Organizadóra halo planu karik, labele liu plafon ne’ebé deside no aprova ona, atu evita dívida ne’ebé mosu barbarak iha Oekusi,” nia hateten.
Notísia relevante:PA interinu RAEOA garante sei halo jestaun di’ak ba ezekusaun OJE 2026
Jornalista: Abílio Elo Nini
Editór: Rafael Ximenes de A. Belo
