OEKUSI, 07 Maiu 2026 (TATOLI) – Durate fulan haat, hahú husi Janeiru mai to’o Abríl 2026 ne’e, Departementu Elétrisidade de Timor-Leste (EDTL) Rejiaun Administrativa Espesiál Oekusi Ambeno (RAEOA), arrekada reseita ba kofre Estadu hamutuk rihun $239,568.07.
“Ita-nia reseita rekolla fulan haat to’o Abríl ne’e, ita konsege hetan rihun $239,568.07,” relata Xefe Departementu EDTL Oekusi, Antão Cabál ba Ajénsia Tatoli,I.P iha Oekusi, ohin.
Notísia relevante:Reseita no despeza EDTL Oekusi dezekilíbriu
Nia esplika, reseita ne’e rekolla mai husi fatin haat hanesn prende enerjia elétrika iha sentru vende edifísiu EDTL, ajente sira-ne’ebé fa’an iha idak-idak nia fatin, husi ligasaun foun no ikusliu mai husi multa ne’ebé instalasaun ilegál.
Nia informa, totál kontadór prepagu ne’ebé instala ona iha Oekusi hamutuk 7000 maioria iha Pante Makasar, maibé dadus ne’e seidauk klaru, balun seidauk identifika tanba ligasaun dahuluk balun seidauk prienxe rekezitu.
“Ami mós hetan ona rekomendasaun husi Ministériu Obra Públika atu halo instalasaun mós ba sub-rejiaun Oésilo, Pássabe inklui Nítibe, maibé ita sei hein despaisu husi Prezidente Autoridade, nune’e bele instala kontadór prepagu nune’e bele hasa’e tan ita-nia reseita ba kofre Estadu,” nia hateten.
Kona-ba dezafiu, ne’ebé EDTL enfrenta durante ne’e maka transporte atu apoia halo monitorizasaun, durante uza de’it karrreta operasaun nian, maibé labele kobre área rurál sira. Aleinde ne’e mós catering, bainhira tékniku halo serbisu liliu revista ho loron no kalan kobre to’o baze, maibé bainhira atu han tenke fila mai vila.
Notísia relevante:EDTL,E.P sei ajuda RAEOA hadi’a sistema kontadór
Entretantu, totál funsionáriu ne’ebé hala’o serbisu iha EDTL Oekussi hamutuk 66, komposta husi permanente no kontratadu.
Jornalista: Abílio Elo Nini
Editór: Rafael Ximenes de A. Belo
