OEKUSI, 25 Fevereiru 2026 (TATOLI) – Ministru Obra Públika (MOP), Samuel Marçal, triste ho reseita husi Eletrisidade de Timor-Leste (EDTL) iha Rejiaun Administrativa Espesiál Oekusi Ambeno (RAEOA), tanba resieta tinan ida hetan de’it rihun 700-resin kompara ho nia gastu besik millaun $7.
Governante fó sai nia deklarasaun ofisiál hafoin hala’o vizita supreza ba iha edifísiu EDTL Oekusi, tersa ne’e.
“Horsehik, ha’u konsulta EDTL sira-nia reseita 2025 nian, sira dehan hetan de’it rihun $700-resin la to’o millaun, depois nia gastu millaun $6 to’o millaun $7 kompra mina, ha’u dehan, ne’e ita mate Estadu lakon. Iha loron rua kotuk ha’u sa’e ba vizita komunidade sira halo kapela kontribui rasik, ahi livre, tanba seidauk monta prepagu, hothotu tenke selu, lakoi kumpre tesi-tiha,” Autoridade ne’e informa iha salaun Álfandega Palaban, ohin.
Notísia relevante:2025, EDTL Oekusi kontribui reseita rihun $744-resin ba kofre Estadu
Autoridade Governativa ne’e fó ezemplu, iha munisipíu konsege hakotu ligasaun liña elétrika, tanba komunidade barak iha área rurál, utiliza liña elétrika gratuita, enkuantu iha fatin seluk kontribui ona ba kofre Estadu, hanesan mós iha iha fatin seluktan balun sei uza ahi gratuita.
“Ita laiha konsiénsia no sentidu ba Estadu ne’e atu lakon, ita-nia rai komesa nakdoko, maibé hakarak ka lakohi ita membru ASEAN, ita tenke hatudu katak, ita bele no merese ukun aan duni,” nia afirma.
Tanba ne’e, Governante ne’e rekomenda ba ekipa EDTL Oekusi, atu kontinua instala prepago (meteran) ba to’o área rurál, no notifika sidadaun sira-ne’ebé lakohi koopera.
“Ha’u mós hateten ona ba EDTL sira, notifika ema ne’ebé lakohi kumpre, no insttala hotu prepago atu selu ba Estadu. Se la’e ita loke ahi kalan to’o loron ita lahatene, ita-nia kustume ida lahatene taka, hatene gasta de’it,” nia apela.
Notísia relevante:Abitante Pássabe husu EDTL Oekusi hadi’a fiu eletrisidade
Rekorde fali katak, antes ne’e Xefe Departamentu EDTL Oekusi, Antão Cabal, fó-sai, hahú husi Janeiru to’o Dezembru 2025, EDTL Oekusi rekolla reseita ba kofre Estadu hamutuk rihun $744,924.42.
Tuir nia, reseita ne’e rekolla liuhusi tipu haat mak hanesan, prepaind e sistema ka vende enerjia elétrika hamutuk rihun $660,595.00, pas-pago konvisionál nian hamutuk rihun $76,231.42, ligasaun foun rihun $7,848.00 no ligasaun illegál rihun $250.00.
Nia informa, kona-ba sistema atendimentu, ekipa EDTL kontinua kobre to’o área rurál sira, liu-liu ai-riin ne’ebé avária, maibé ba sira-ne’ebé instala ona kontadór prepago kuaze rihun 17-resin maioria iha sub-rejiaun Pante Makasar.
Tanba ne’e, parte EDTL rekomenda ona ba Autoridade katak, planu ba futuru bele instala mós konsumidór sira iha sub-rejiaun Oésilo, Pássabe inklui Nítibe.
Jornalista: Abílio Elo Nini
Editór: Rafael Ximenes de A. Belo
