OEKUSI, 08 Janeiru 2026 (TATOLI) – Hahú hosi Janeiru mai to’o Dezembru 2025, Departamentu Eletrisidade Timor-Leste (EDTL) Rejiaun Administrativa Espesiál Oekusi Ambeno (RAEOA), rekolla reseita ba kofre Estadu hamutuk rihun $744,924.42.
“Reseita ne’e rekolla liuhosi tipu haat mak hanesan, prepaid e sistema ka vende enerjia elétrika hamutuk rihun $660,595.00, pas-pago konvensionál nian hamutuk rihun $76,231.42, ligasaun foun rihun $7,848.00 no ligasaun illegál rihun $250.00,” Xefe Departamentu EDTL Oekusi, Antão Cabal relata, iha Oekusi, ohin.
Notísia relevante:Janeiru to’o Maiu, EDTL Oekusi kontribui reseita rihun $36 ba kofre Estadu
Xefe departamentu ne’e informa, kona-ba sistema atendimentu, durante ne’e ekipa EDTL kontinua kobre to’o área rurál sira, liu-liu ai-rin ne’ebé avária, maibé ba sira-ne’ebé instala ona kontadór prepago kuaze rihun 17-resin maioria iha sub-rejiaun Pante Makasar.
Tanba ne’e, parte EDTL rekomenda ona ba Autoridade katak, planu ba futuru bele instala mós konsumidór sira iha sub-rejiaun Oésilo, Pássabe inklui Nítibe.
“Ami kontinua hala’o operasaun ba kliente sira-ne’ebé seidauk utiliza prepago, no mós kliente ne’ebé uza ona maibé sobu halo ligasaun direita, tanba ne’e ami hato’o ona rekomendasaun ba Prezidente Autoridade RAEOA, katak ba futuru bele monta mós prepago ba iha sub-rejiaun tolu, tanba daudaun foin to’o Oébaha suku Bobometo,” nia hateten.
Notísia relevante:Abitante Pássabe husu EDTL Oekusi hadi’a fiu eletrisidade
Tuir ezekutivu ne’e, reseita 2025 ne’e sa’e kompara ho 2024 nian, tanba iha tinan kotuk EDTL rekolla de’it rihun $504,984.34, tanba aumenta nova ligasaun no monta prepago.
Entretantu, totál funsionáriu ne’ebé hala’o serbisu iha EDTL Oekusi hamutuk na’in-68 komposta hosi funsionáriu permanente 15 restante kontratadu.
Jornalista: Abílio Elo Nini
Editór: Rafael Ximenes de A. Belo
