OEKUSI, 25 Juñu (TATOLI) – Durante fulan lima, hahú husi Janeiru to’o Maiu 2025, Departementu Eletrisidade de Timor-Leste (EDTL), Rejiaun Administrativa Espesiál Oekusi Ambeno rekolla reseita ba kofre Estadu hamutuk rihun $36,965.92.
Notísia relevante:Dezde 2015, EDTL Oe-Cusse hatama reseita millaun $1-resin
Xefe Departementu EDTL Oekusi, Antão Cabal, relata orsamentu ne’e rekola liuhusi husi fonte tolu no hahú husi Janeiru $8,930.64, Fevereiru $2,723.28, Marsu $7,466.27, Abríl $10,815.30 no Maiu $7,030.43.
“Orsamentu ne’e kobre husi prepagu faan pulsa nian no pospagu hanesan kliénte balun halo pedidu, depois instala kontadór konvensionál nian, ikusliu ligasaun foun, reseita ne’e la inklui sansaun ba sira-ne’ebé dada ilegál tanba durante ne’e EDTL seidauk deteta,” nia dehan iha Oekusi, ohin.
Nia informa, reseita referidu kompara ho gastu nian iha diferénsia bo’ot tanba gastu iha EDTL tipu tolu, primeiru tenke halo despeza ba operasaun mákina iha sentrál elétrika Inur Sakato, funsionáriu sira-ne’ebé presta servisu ba EDTL no liña distribuisaun no administrasaun nian.
Notísia relevante:EDTL Oé-Cusse normaliza poste ne’ebé hetan estragu hosi dezastre naturál
Daudaun ne’e, EDTL instala ona prepagu hamutuk rihun 15, hahú husi suku fronteira Sakato suku Nípani ba to’o suku Lifau perténsia tasi-ibun no sa’e ba área rurál foin to’o de’it aldeia Oébaha suku Bobometo sub-rejiaun Oésilo.
Iha biban ne’e, Madalena Taimenas, nu’udar komsumidór, hateten nu’udar sidadaun timoroan, tenke kontribui ba Estadu, nune’e bele halo dezenvolvimentu liuhusi rekolla reseita sira-ne’e.
“Ita hola pulsa ne’e, nu’udar kontribuisaun ba Estadu hanesan ohin ha’u hola ba fulan-ida nian, ha’u gasta dolár $15, tanba uza ba tein, jelera, bentuña inklui bee-moos, ne’ebé ita tenke kumpre, tanba osan ba Estadu depois Estadu uza halo dezenvolvimentu ba ita-nia rai,” nia hateten.
Notísia relevante:EDTL Nasionál observa sentrál elétrika Inur Sakato Oé-Cusse
Jornalista: Abílio Elo Nini
Editór: Florencio Miranda Ximenes
