OÉ-CUSSE, 25 janeiru 2024 (TATOLI) – Dezde 2015 Departamentu Eletrisidade Timor-Leste (EDTL) eziste iha Rejiaun Administrativa Espesiál Oé-Cusse Ambeno (RAEOA), hatama ona reseita $1,896,585.02 bá kofre Estadu.
Xefe Departamentu EDTL Oé-Cusse, Armindo Maria Mendonça informa, dezde 2015 to’o 2023 EDTL Oé-Cusse konsege rekolla $1,896,585.02 hatama ona iha kofre Estadu liuhosi prepagu kuaze rihun-neen, maioria simu hosi sistema ne’ebé EDTL fa’an la inklui token sira seluk, tanba balu bele hola iha Timor Telecom, mosan, hola hosi Dili no loza balun, ne’e la inklui janeiru 2024 nian.
Totál taxa ne’ebé rekolla hahú hosi 2015 to’o 2023 ne’e hamutuk $1,896,585.02 (millaun $1-resin) komposta hosi 2015 rekolla $84,588.15, 2016 rekolla $180,485.00, iha 2017 rekolla $273,800.85.
Nune’e mós iha 2018 rekolla $315,080.31, iha 2019 rekolla $248.586.61, iha 2020 rekolla $156,624.65, iha 2021 rekolla $276,557.68, ba fali 2022 rekolla $360,861.77 no iha janeiru 2023 EDTL rekolla ona $17,547.00.
Nia dehan, tama fali iha fulan-janeiru 2024 nian, EDTL reseita ba kofre Estadu hamutuk $10.962.00 liuhosi prepagu.
“Agora tama 2024 to’o horisehik 25 janeiru ne’e, ita rekolla ona $10.962.00 hatama ba kofre Estadu,” Xefe Departamentu EDTL Oé-Cusse, Armindo Maria Mendonça, informa ba jornalista sira iha edifísiu EDTL Oé-Cusse, sesta ne’e.
Notísia relevante: Trimestre datolu, EDTL Oé-Cusse kontribui rihun $80-resin ba kofre Estadu
Armindo Maria Mendonça, hateten reseita EDTL iha 2023, hahú hosi fulan jullu to’o dezembru hamutuk $189,998.82, bá fulan-janeiru to’o juñu seidauk sura, tanba komputadór fallansu, ne’ebé data kona-bá fulan-janeiru mai to’o juñu sei hadi’a, atu kakerek tuir arsip ne’ebé seidauk tama.
“Ne’ebé reseita $189,998.82 ne’e, ita rekolla mai hosi pagamentu prepagu, sira-ne’ebé rejista foun, ho sira-ne’ebé invoice hanesan Telemor, Timor Telecom no Telekomcel, inklui loza balun ne’ebé nia meteran konvensionál,” nia katak.
Xefe Departamentu ne’e lakoi esplika detalla kona-bá taxa ba komersiante sira-ne’ebé dada ilegal, tanba EDTL laiha koñesimentu, maibé bainhira hetan deteta, parte EDTL desliga no aplika kedas sansaun selu-multa.
“Sansaun ne’e, ita sura tuir nia gastu, sei nia la hola pulsa hahú sá fulan, nia uma laran uza ahi ba saida de’it, ida-ne’e mak ita sura hamutuk foin hetan nia rezultdu gasta ahi ne’e hira no selu tuir montante gastu ahi ne’e,” nia informa.
“Ita-nia totál prepagu iha Oé-Cusse kuaze rihun-neen maka komunidade sira uza ona, no taxa ne’e mós la envolve multa tanba dada ilegál, ne’e taxa ba prepagu nian ne’ebé fa’an liuhosi sistema EDTL nian,” nia hateten.
Notísia relevante:EDTL Oé-Cusse sei fó sansaun ba konsumidór dada ahi ilegál
Nia fundamenta, daudaun ne’e konsumidór ne’ebé uza só de’it iha zona sentrál sub-rejiaun Pante Makasar, iha sub-rejiaun Oésilo, Pássabe no Nítibe seidauk monta, tanba parte EDTL sei rekolla hotu dadus kada transformadór sira maka foin halo sensibilizasaun ba komunidade molok halo instalasaun.
“Bainhira iha monta ona, parese ita uza de’it MCB ampere, ita sei implementa bazea regulamentu ne’ebé antes ne’e autoridade anunsia ona ba iha públiku sei selu kada ampere,” nia akresenta.
Notísia relevante: Governu Sentrál presiza loke konkursu públiku kombustível bá Sentrál Elétrika Inur Sakato
Purtantu, totál funsionáriu ne’ebé presta servisu iha Departamentu Eletrisidade Oé-Cusse hamutuk na’in-62 komposta hosi permanente 16 kontratadu 46.
Jornalista : Abílio Elo Nini
Editór : Evaristo Soares Martins
