Governu Sentrál presiza loke konkursu públiku kombustível bá Sentrál Elétrika Inur Sakato
OÉ-CUSSE, 22 janeiru 2024 (TATOLI) – Prezidente Autoridade sesante iha Rejiaun Administrativa Espesiál Oé-Cusse Ambeno (RAEOA), Arsénio Paixão Bano, husu ba Governu Sentrál atu halo konkursu públiku kombustivél bá sentrál elétrika Inur Sakato, tanba kombustível sei hotu iha fulan-fevereiru 2024.
Notísia relevante: EDTL Nasionál observa sentrál elétrika Inur Sakato Oé-Cusse
Prezidente Autoridade RAEOA esplika, kompañia Wartsila nia kontratu sei termina iha loron 29 fevereiru 2024 ne’e.
“Ohin EDTL nasionál mai ho orientasaun hosi Governu Sentrál atu buka hatene, konfirma, loos duni ka lae, problema kombustível sentrál elétrika Sakato atu hotu, ita esplika buat-ne’ebé maka ita enfrenta daudaun,” Arsénio Paixão Bano, hato’o asuntu ne’e, iha ámbitu enkontru ofisiál ho Prezidente Konsellu Administrasaun EDTL.EP, Paulo da Silva, iha salaun Gabinete ZEESM Oé-Cusse, segunda ne’e.
“Problema ita-nian, ita tenke iha autoridade ne’ebé maka hahú ona prosesa sasán sira-ne’e, atu listrik ne’e labele para, realidade ita-nia mina atu hotu iha meadu fevereiru, kontratu sei to’o de’it loron 29 fevereiru 2024 ne’e, entaun Governu presiza halo ona preparasaun, atu halo fali tenderizasaun foun,” nia husu.
Tuir nia, sentrál elétrika Sakato konstrui iha mandatu dahuluk Prezidente Autoridade Mari Alkatiri, konsege investe besik millaun $37, nune’e kooperasaun ne’e tenke la’o nafatin, tanba durante tinan hitu povu Oé-Cusse, goza ona eletrisidade oras 24.
“Ne’e maka ohin ha’u hato’o ba tékniku sira hosi Governu Sentrál, ha’u dehan, favór hato’o hela ba Governu, tanba ha’u-nia karta hato’o ona la’ós foin dala-ida, tinan kotuk mós ami alerta situasaun ida-ne’e presiza halo ona tenderizasaun ba preparasaun,” nia rekomenda.
Nia informa, funsionáriu na’in-44 daudaun ne’e halao hela servisu iha EDTL Oé-Cusse, no na’in-16 iha sentrál Sakato hanesan operadór maibé seidauk iha kontratu to’o agora.
“Ha’u hanesan autoridade sesante, nu’udar Oé-Cusse oan patriota, ha’u lakoi sasán iha Oé-Cusse macet, ha’u husu ho haraik-aan ba tékniku sira, atu kontinua hala’o servisu, listrik labele mate,” nia katak.
Notísia relevante: Kombustível bá sentrál elétrika Sakato sei hotu iha fevereiru
Prezidente Konsellu Administrasaun EDTL.EP, Paulo da Silva, esplika, preparasaun konkursu públiku foun, servisu aprovizionamentu, iha regra atu determina, maibé Governu sei garante mina ba iha sentrál elétrika.
Entaun servisu aprovoizionamentu sei la’o, Governu sei halo desizaun tanba kontratu fornesedór atuál ne’e sei to’o loron 29 fevereiru 2024 ne’e, signifika sei iha tempu depois balansu fornese ne’ebé kuantidade ne’ebé sei iha-ne’e, kontinua garante, atu halo prosesu aprovizioamentu ba kontratu tuir mai.
“Ha’u hanoin sei la-mate, ita tenke hanoin pozitivu, Governu muda, estrutura muda, maibé eletrisidade tenke funsiona, tanba ne’e maka ohin ami mai, orientasaun Governu Sentrál nian, mai atu hatene situasaun, no tempu besik sei halo desizaun oinsá maka fornese kombustível funsiona, fornese mina ba sentrál no mós servisu tékniku iha sentrál, no liña distribuisaun tenke funsiona,” nia katak
Notísia relevante: Trimestre dahuluk 2023, EDTL Oé-Cusse kontribui reseita rihun $74-resin
Jornalista: Abílio Elo Nini
Editór: Evaristo Soares Martins
