OÉ-CUSSE, 18 janeiru 2024 (TATOLI) – Prezidente Autoridade sesante iha Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa, kombustivél ba sentrál elétrika Inur Sakato sei hotu iha fulan-fevereiru 2024 ne’e, tanba seidauk iha konkursu públiku foun hodi fornese.
Esforsu ne’ebé Autoridade daudaun halo, atu mantein situasaun Oé-Cusse to’o nomeasaun Autoridade foun, maibé to’o ohin loron seidauk iha ba líder foun lidera RAEOA.
Notísia relevante: PM Xanana hakarak hasoru Oé-cusse oan molok hili estrutura autoridade
Dezde tinan kotuk Autoridade sesante halo ona ezersísiu, konfirma Governu Sentrál, nomea Prezidente foun atu kontinua servisu públku dezde mandatu Mari Alkatiri mai to’o daudaun ne’e.
Arsénio Paixão Bano, hateten, preokupasaun bootliu maka sentrál eletrika Inur Sakato, sira-ne’ebé servisu iha eletrisidade Oé-Cusse na’in-40 maioria kontratadu ba sentrál elétrika Inur Sakato na’in-16 hanesan funsionáriu kontratadu, maibé daudaun kontinua servisu la ho kontratu.
“Ohin ha’u atu hato’o ba RAEOA iha gazoel atu sustenta sentrál elétrika Sakato sei to’o de’it fulan-fevereiru nia klaran, entaun populasaun sira labele paniku, tanba ami halo ona komunikasaun horisehik, karta dala ikus ha’u haruka ba Governu Sentrál kona-bá situasaun ida-ne’e tanba presiza medida lalais,” Arsénio Bano informa liuhosi konferénsia imprensa iha Oe-Cusse, kinta ne’e.
Nia informa, servisu barak Autoridade sesante hala’o ona, maibé presiza ona tranzisaun ba mudansa lideransa ne’ebé ho di’ak ba kontinuasaun dezenvolvimentu sira iha Oé-Cusse.
Notísia relevante:Arsénio Prepara hela relatóriu atu entrega ba PA foun
“Razaun kombustível menus, tanba iha tinan kotuk ami hato’o ona ba Governu, iha lei ne’e Governu atu halo aprovizionamentu ba mina eletrisidade ninian maibé laiha resposta, no lei ne’e aprova tiha ona iha Parlamentu Nasionál maibé to’o Prezidente Repúblika la promulga,” nia esplika.
“Entaun ita la biban atu halo aprovizionamentu foun tanba agora daudaun pertamina mak fornese hela mina ba sentrál elétrika Inur Sakato, no bainbain ne’e ita halo tenderizasaun (konkursu públiku) ba tinan ida nian, no nia rezerva to’o fulan rua ba kompañia bele kontinua servisu,”.
“Maibé ne’e mós iha ligasaun ho revogasaun lei foun no problema sira-ne’e ita hato’o ba Governu maibé to’o agora seidauk iha resposta, tan ne’e maka seidauk iha kompañia atu fornese mai Oé-Cusse, no mina ne’ebé daudaun iha to’o de’it fevereiru nia klaran,” nia klarifika.
Notísia relevante: Arsénio husu povu Oé-Cusse kontinua servisu ho vontade no hein autoridade foun
Jornalista: Abílio Elo Nini
Editór: Evaristo Soares Martins
