Arsénio Prepara hela relatóriu atu entrega ba PA foun
OÉ-CUSSE 30 novembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano no membru autoridade sira, prepara hela relatóriu servisu atu entrega ba Prezidente Autoridade (PA) foun.
Nune’e kinta ne’e, Prezidente Autoridade ne’e realiza enkontru extraordináriu ho membru autoridade sira hodi prepara relatóriu servisu no kontinua hein hodi entrega servisu ba Autoridade foun.
Notísia relevante: Prezidente Repúblika promulga ona alterasaun lei RAEOA no ZEESM
“Ohin, ami halo enkontru extraordináriu Autoridade RAEOA no ZEESM-TL ninian, atu diskute saida mak presiza halo, ba oin, tanba Lei ne’ebé maka aprova iha Parlamentu Nasionál, ohin Prezidente Repúblika promulga ona, hein públikasaun de’it ohin ka aban, ha’u ho membru Autoridade sira sesante,” Arsénio Paixão ba jornalista sira hafoin enkontru iha Gabinete ZEESM Oé-Cusse.
Nia hatutan, membru Autoridade RAEOA sai sesante, signifika to’o nomeasaun Prezidente Autoridade foun hosi Primeiru Ministru, sei koopera hodi entrega servisu ba líder foun ne’e, bele kontinua servisu sira iha Oé-Cusse Ambeno.
“Ohin ami mós halo diskusaun kona-bá preparativu sira, hanesan Prezidente Autoridade, prepara ha’u-nia relatóriu hamutuk ho membru Autoridade, atu hato’o ba Primeiru Ministru,” nia katak.
Nia relembra, antes ne’e iha aktu rua, karta demisaun autoridade hato’o ona iha Primeiru Ministru, maibé to’o ohin loron resposta seidauk iha, maibé iha Lei RAEOA ohin promulgadu, Lei ne’e mós hateten, bainhira públika ein-vigór, bele nomeia líder foun.
Arsénio Bano, husu servidór Estadu atu kontinua servisu, kona-bá Prezidente Repúblika promulga alterasaun datoluk Lei númeru 3/2014, loron 18, fulan-juñu ba kriasaun RAEOA no ZEESM-TL, tanba Governu maka deside.
“Ba promulgasaun ne’e, ha’u hanoin laiha problema, hotu-hotu kontinua servisu iha rai Oé-Cusse, tuir saida maka Governu deside, ne’ebé kontinua servisu hodi hein autoridade foun mai lidera fali RAEOA, tanba ha’u mós la hatene bainhira maka mai troka ami, tempu besik di’akliu, bele akontese semana oin, ita prontu atu koopera,” nia tenik.
Notísia relevante: Autoridade RAEOA kontinua hein despaxu ofisiál hosi Primeiru Ministru
Jornalista: Abílio Elo Nini
Editór: Evaristo Soares Martins
