OÉ-CUSSE, 22 janeiru 2024 (TATOLI) – Ministru Obra Públika, Samuel Marçal, orienta ekipa tékniku Eletrisidade Timor-Leste, Empreza Públika (EDTL,EP) lideradu Prezidente Konsellu Administrasaun EDTL.EP, Paulo da Silva, segunda ne’e observa direita funsionamentu sentrál elétrika Inur Sakato iha Rejiaun Administrativa Espesiál Oé-Cusse Ambeno (RAEOA).
“Ohin ekipa ida hosi EDTL.EP nasionál hamutuk ho tékniku sira, iha vizita ida-ne’e hetan orientasaun hosi Ministru Obra Públika, atu haree kondisaun reál kona-bá funsionamentu enérjia elétrika iha RAEOA,” Prezidente Konsellu Administrasaun EDTL.EP, Paulo da Silva, ba jornalista sira iha Gabinete ZEESM Oé-Cusse, segunda ne’e.
Notísia relevante: Arsénio Bano sei hala’o enkontru espesiál ho empreza Wartsila iha Jakarta
Nia dehan, Governu Sentrál sei tau matan ho urjentemente, atu labele perturba funsionamentu fornesimentu elétrika, ho nune’e ministru orienta ekipa ida-ne’e atu mai Oé-Cusse.
“Ohin ami ko’alia ho Prezidente Autoridade sesante, hodi ba observa sentrál elétrika Inur Sakato, depois rekolla informasaun adekuadu, depois ami fila relata ba ministru, depois halo desizaun saida maka bele halo, atu nune’e garante sentrál elétrika labele para, no fornesimentu enérjia elétrika kontinua la’o, ha’u hanoin laiha problema, hein desizaun polítika lalais, atu labele perturba,” nia afirma.
Iha vizita ofisiál ne’e, Xefe Departamentu EDTL Oé-Cusse, Armindo Maria Mendonça, relata iha Oé-Cusse, ahi kobre hotu ona área rurál sira.
Maibé hela de’it sira-ne’ebé foin forma uma-kain maka balu seidauk dada, maibé uma lulik sira iha fatin izoladu iha territóriu Oé-Cusse 100% asesu ona ahi enérjia elétrika.
“Ahi sei la mate tanba ami iha kontaktu mós ho EDTL nasionál, ne’ebé ohin ekipa to’o Oé-Cusse, ami husu apoia atubele asegura kontinua lakan nafatin.”
Notísia relevante: Kombustível bá sentrál elétrika Sakato sei hotu iha fevereiru
Jornalista: Abílio Elo Nini
Editór: Evaristo Soares Martins
