iklan

EKONOMIA, HEADLINE, MUNISÍPIU, OÉ-CUSSE (RAEOA)

EDTL Oé-Cusse normaliza poste ne’ebé hetan estragu hosi dezastre naturál

EDTL Oé-Cusse normaliza poste ne’ebé hetan estragu hosi dezastre naturál

Tékniku EDTL Oe-Cusse normaliza poste ne’ebé hetan estragu hosi dezastre naturál. Imajen Tatoli/Abílio Elo Nini.

OÉ-CUSSE, 25 janeiru 2024 (TATOLI) – Ekipa tékniku hosi Eletrisidade Timor-Leste  (EDTL) iha Rejiaun Administrativa Espesiál Oé-Cusse Ambeno (RAEOA), sesta ne’e hahú hadi’a ona poste no liña elétrika sira-ne’ebé hetan estragu hosi dezastre naturál.

Xefe Departamentu EDTL Oé-Cusse, Armindo Mendonça, informa, iha loron kinta 25 kalan akontese anin boot akompaña ho udan, ahi lakan no mate tanba afeta ba poste no fiu balu monu iha fatin hotu, nune’e hafoin udan-been menus ekipa tékniku sira hahú halo ona operasaun.

“Akontese horikalan afeta tebes ba ita-nia liña kona-bá liña poste, liña baixa, médiu no tensaun halo sasán balu tohár, ne’e duni komesa horisehik to’o ohin ami hala’o hela normalizasaun, atu rezolve ai sira-ne’ebé monu hanehan fiu, balu monu hosi poste-leten tanba anin-boot,” Armindo Mendonça, ko’alia iha Oé-Cusse.

Xefe Departamentu ne’e hatutan, dezastre naturál ne’e  akontese anin-boot akompaña ho udan, afeta maka’as iha sub-rejiaun Nítibe, rezulta fiu monu barak iha fatin-fatin, tanba anin boot, fiu monu beibeik to’o poste balu kotu no monu.

Iha sub-rejiaun Oésilo nian, iha suku Bobometo, aldeia Saben, akontese isolatór pink, anin-boot silu tohar.

“Ne’ebé ami sei halo normalizasaun, depois to’o sei atende servisu ki’ik balu, tanba iha-ne’ebá servisu todan,” nia informa.

Nune’e mós iha sub-rejiaun Pante Makasar, kontinua atende iha aldeia Lakufoan, no iha suku Costa vila laran, sei kontinua atende hela baixada sira-ne’ebé hetan estragu iha uma sira no barak ai mak hanehan.

Nia hateten, agora fiber lima (5) diresaun ba Nítibe mate hela, tanba akontese ai hanehan monu fiu monu iha suku Lifau, ekipa sei hadi’a hela, depois kontinua rezolve liña sira hosi Pante Makasar ba to’o sub-rejiaun Nítibe, liuliu suku Usitaku, Lela-Ufe, kontinua mai to’o suku Usitasa’e mai to’o Oésilo ba liu sub-rejiaun Pássabe, kuandu laiha maka mak bele tama fila-fali.

Xefe Departamentu ne’e, husu konstribuisaun hosi komunidade, bainhira akontese dezastre ruma liu-liu afeta fasilidade eletrisidade nian, presiza informa ba tékniku sira-ne’ebé destaka ona iha nível sub-rejiaun sira nune’e bele hetan normaliza imediata.

“Ha’u husu ba konsumidór sira hotu, presiza ita hotu nia pasiénsia, tanba natureza afeta ba buat barak, maibé tékniku iha EDTL esforsa nafatin ho maneira ne’ebé iha, hodi hadi’a ita-nia liña ne’ebé hetan dezastre, la presiza ezije maibé ami presiza informasaun atubele ba hadi’a lalais,” nia husu.

Notísia relevante: Janeiru 2023, EDTL Oé-Cusse rekolla reseita rihun $17-resin

Entretantu, rekursu umanu durante ne’e, EDTL destaka iha suku 18 maioria komersiál no distribuisaun nian, hodi atende de’it problema ne’ebé ki’ik, maibé kuandu akontese dezastre boot ba lina elétrika, ekipa hosi EDTL rejionál ba direita.

Totál funsionáriu ne’ebé presta servisu iha Departamentu Eletrisidade Oé-Cusse hamutuk na’in-62 komposta hosi permanente 16 no kontratadu 46.

Notísia relevante: Dezde 2015, EDTL Oe-Cusse hatama reseita millaun $1-resin

 Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!