Implementa lei organizasaun judisiária, MJ sei konvoka enkontru ho PTR-PGR
DILI, 20 fevereiru 2024 (TATOLI)-Ministru Justisa, Sergio Hornai, hateten, iha tempu-badak nia laran sei enkontru ho Prezidente Tribunál Rekursu (PTR), Deolindo dos Santos no Prokuradór Jerál Repúblika (PGR) Alfonso Lopez, atu ko’alia kona-ba implementasaun lei Organizasaun Judisiária.
“Lei organizasaun judisiáriu ne’e ita presiza suspende tanba kestaun rekursu tanba buat ruma ne’ebé ita presiza hadi’a, ita presiza suspende ho razaun tanba rekursu, sirkuntánsia sira seluk ita tenki pondera nune’e ita bele halo artikulasaun molok nia implemetasaun,” Sergio Hornai hateten ba jornalista sira hafoin konvoka enkontru ho grupu traballu ba reforma judisiáriu ne’ebé lideradu hosi Lucia Lobato, iha salaun MJ Colmera, tersa ne’e.
Governante ne’e hateten, atu imeplementa lei Organizasaun judisiária, Ministériu Justisa (MJ) sei realiza reniaun ida ho Prezidente Tribunál Rekursu (PTR), Prokuradór Jerál Repúblika (PJR), ho entidade nakaet sira iha setór judisiáriu atu haree oinsá mak iha kordenasaun ida di’ak atu nune’e molok ba implementasaun lei organizasaun judisiáriu bele la’o di’ak.
Iha sorin seluk, Jurista Sergio Quintas, husu ba Ministru Justisa, Sergio Hornai atu tau importánsia ba implementasaun lei Organizasaun judisiária. Nune’e lei Organizasaun judisiária bele implementa.
“Ita espera katak Ministru Justisa foun ne’ebé simu ona pose foin daudaun ne’e nia tenke haree ona oinsá kria kondisaun para bele impementasaun lei organizasaun judisiaria ne’e,” nia afirma.
Jurista ne’e dehan, lei Organizasaun Judisiária Prezidente Repúblika promulga ona iha 2022, maibé nia implementasaun seidauk.
Iha biban ne’e, Jurista Sergio Quintas husu mós ba Ministru Justisa foun atu halo revizaun fila fali ba lei indultu ne’ebé mak foin dadaun Prezidente Repúblika promulga ona iha 2023.
Tanba lei indultu ne’ebé mak foin daudaun Xefe Estadu promulga ona tinan kotuk ne’e, lei ida ne’e la fó vantajen ba Timor-Leste nu’udar Estadu demokrátiku.
“Entaun ita espera katak ho Ministru Justisa foun ida ne’e bele haree lei indultu ida ne’e bele halo revizaun fali lei ne’e,” nia adianta.
Nia mós husu ba MJ Sergio Hornai atu hadi’a servisu atendimentu iha Diresaun Jerál Servisu Rejistu Notariadu (DJSRN) nian liuliu atendimentu kaderneta Pasaporte, Billete Identidade (BI) no Sertidaun Moris, tanba durante ne’e atendimentu ba iha kestaun sira ne’e sempre hamosu problema iha servisu rejistu notariadu.
“Durante ne’e atendimentu Pasaporte no BI, sai problema, liuliu foin dadaun ita haree katak Pasaporte ne’e sai preukupasaun maibé holideransa Sergio Hornai nian ne’e ita espera bele rezolve kestaun sira ne’e,” nia afirma.
Jurista Sergio Quintas deposita konfiansa tomak ba iha Ministru Justisa foun tanba nia (Sergio Hornai) hanesan ema ne’e servisu kle’ur ona iha área justisa dezde tempu UNTAET nia tempu to’o agora saida mak sai hanesan dezafiu no problema iha setór justisa Timor-Leste.
“Nia (Sergio Hornai) mós asume kargu hanesan Defensoria Públika Jerál no hanesan Komisáriu CAC, nia iha esperiénsia iha setór justisa, tanba ne’e ha’u laiha dúvida ba Ministru Justisa ida agora,” nia konklui.
Notísia relevante:Prioridade MJ Sergio Hornai hafoin simu pose
Jornalista: Natalino Costa
Editór: Rafael Ximenes de A. Belo
