COVALIMA, 20 fevereiru 2024 (TATOLI) – Timor-Leste selebra kada tinan, iha 3 marsu, Loron Nasionál Veteranu nian, tanba ne’e Konsellu Munisipál Kombatente Libertasaun Nasionál (CMCLN, sigla portugés) Covalima halo ona koordenasaun ho autoridade kona-ba preparasaun hodi komemora loron ida ne’e ba dahituk nian ne’ebé deside ona tema mak “Juntos Marcharemos para o Futuro”.
Sekretáriu-Ezekutivu CMCLN, Manuel Henrique Barreto ‘Fitun’, dehan parte rua halo ona sorumutu hodi informa ba malu sobre preparativu sira no sekuénsia husi serimónia ne’ebé sei hahú iha loron 2 to’o 3 marsu.
“Tinan-tinan ita komemora loron nasionál konsentra iha nasionál, maibé tinanne’e mnisípiu ida-idak halo preparasaun hodi komemora Loron Nasionál Veteranu”, Manuel Henrique Barreto hatete iha Tabakolot, ohin.
Maske CMCLN halo ona koordenasaun, maibé daudaun seidauk iha orsamentu atu halo atividade, tanba ne’e hein de’it bainhira transfere ona ba konta bankária Konsellu Veteranu hodi halo preparasaun.
Verba ne’ebé aloka ba komemorasaun Loron Nasionál Veteranu iha Covalima hamutuk rihun $5 hodi hala’o atividade sira hanesan iha loron 2 marsu husu misa agradesimentu hafoin kari ai-funan iha monumentu masakre Setembru Negro no tau ai-funan iha Saudozeu Álvaro do Nascimento ‘Sesurai’ nia rate no iha loron 3 marsu sei hala’o serimónia isár bandeira.
Administradór Munisípiu Covalima, Francisco de Andrade, lembra katak Konsellu Veteranu Munisípiu relata, foin lalais, preparativu sira ba autoridade atu hala’o atividade serimónia isár bandeira ne’ebé sei realiza iha resintu Administrasaun Munisípiu Covalima.
“ Ha’u laiha objesaun tanba Loron Nasionál Veteranu importante. Nu’udar ema luta na’in serisu hamutuk nune’e bele selebra Loron Veteranu ho di’ak”, realsa.
Rekorde katak iha komemorasaun loron refere iha tinan kotuk ho tema “Hametin Unidade ba Dezenvolvimentu Nasionál” ne’ebe Governu aloka rihun $250 ba selebrasaaun ne’e realiza hamutuk iha nasionál.
Notísia relevante: Governu aloka rihun $250 selebra loron nasionál veteranu
Jornalista: Celestina Teles
Editora: Maria Auxiliadora
