Tékniku EDTL,E.P Uatulari menus fasilidade protesaun no laiha transporte
VIQUEQUE, 20 fevereiru 2024 (TATOLI)-Tékniku Eletrisidade de Timor Leste, Empreza Públiku (EDTL,EP), postu Uatulari, Felisano de Almeida, informa, daudaun ne’e enfrenta problema ba fasilidade protesaun no laiha transporte atu apoia sira bainhira ba halo manutensaun eletrisidade.
“Ami tékniku EDTL,EP postu Uatulari hetan tiha karreta ida fasilita ami tula eskada, maibé EDTL,E.P hosi munisípiu Viqueque foti fila tiha karreta no ami laiha fasilidade protesaun liuliu laiha sintu, nune’e defisil tebes atu ami ba halo manutesaun iha tereñu bainhira ahi avaria”, informa Tékniku EDTL, E.P ne’e ba Agência Tatoli,I.P, iha postu Viqueque Vila, ohin.
Nia dehan maske fasilidade laiha maibé kontinua serbisu hodi garante eletrisidade lakan normál ba populasaun sira iha Uatulari.
“Ho preokupasaun sira-ne’e ami hato’o ona ba munisípiu, maibé seidauk iha resposta ruma ba ami-nia fasilidade sira atu agrante ba enérjia ba ba komunidade sira”, nia sujere.
Tuir dadús liña MT 77 kilométru, liña BT 118 kilométru, trasformadór hamutuk 25 no kliente ka utilizadór ahi eletrisidade iha posto Uatulari ho hamutuk uma-kain 3.424.
Hataan ba kestaun ne’e, Supervizór EDTL, E.P munisípiu Viqueque, Eduardo Sarmento, rekoñese katak fasilidade sira-ne’ebé tékniku sira enfreta loos tanba fasilidade laiha duni, nune’e tau ona bá perioridade atu halo proposta ba nasionál atu responde kestaun ne’e.
“Ba fasilidade hanesan orsamentu inklui transporte atu hato’o on aba EDTL,E.P nasionál hodi deside atu sosa”, nia afirma.
Enkuantu, Tuir dadús funsionáriu ka tékniku EDTL,E.P postu Uatulari hamutuk na’in-5 hodi halo atendimentu ba funsionamentu enerjia ba suku neen.
Projetu eletrifikasaun abandonadu
Abitante Aldeia Loco-Loco, suku Matahoi, postu administrativu Uatulari, munisípiu Viqueque sente preokupa ba implementasaun projetu komunitária eletrisifikasaun tanba to’o agora seidauk finanliza no abandonadu
“Projetu ne’e implementa iha tinan kotuk 2023, maibé to’o projetu ne’e seidauk finaliza no abandonadu,” Reprezentante abitante Loco-Loco, Manuel dos Santos
Maske, nia dehan ai-rin eletrisidade abitante Loco-Loco ajuda tékniku EDTL.E.P sira hodi hatur hotu ona, maibé seidauk dada fiu eletrisidade.
Nune’e, nia husu ba EDTL.E.P atu aseleira projetu ida-ne’e atu bele komunidade asesu ba eletrisidade.
Hataan ba preokupasaun ne’e, Supervizór EDTL,EP munisípiu Viqueque, Eduardo Sarmneto, afirma projetu eletrifikasaun komunitária ba aledia Loco-Loco servisu la abandona, maibé materiál sira hanesan fiu maka seidauk to’o iha armazéin EDTL,E.P nasionál tanba ne’e maka servisu seidauk la’o.
“Ita la abandona, maibé ami hein materiál tanba to’o agora materiál seidauk to’o iha armazén nasionál. Bainhira to’o iha Dili ami hahú dada fiu ba aldeia Loco-Loco hodi finaliza servisu atu ita-nia abitante sira bele asesu ba ahi ”, nia klarifika
Projetu komunitária ne’e hahú iha fulan abríl tinan 2023. Tuir dadus, abitante iha aldeia Loco-Loco hamutuk 200-resin hosi uma-kain 73.
Notísia relevante: Tékniku EDTL, E.P no abitante Loco-Loco Uatulari hahú hatuur ai-rin liña eletrisidade
Jornalista : Vitorino Lopes da Costa
Editór : Florencio Miranda Ximenes
