OÉ-CUSSE, 21 fevereiru 2024 (TATOLI) – Sekretária Rejionál ba Asuntu Agrikultura, Rejiaun Administrativa Espesiál Oé-Cusse Ambeno (RAEOA), Filomena Sila, hamutuk ho padre no estudante sira hosi Eskola Tékniku Agríkola Oé-Cusse (ETARO), kuarta ne’e kuda ai-oan hamutuk 70 iha Igreja Nossa Senhora do Rosário Numbei Oé-Cusse.
Notísia relevante: Autoridade RAEOA sei restrinje sirkulasaun animál iha área urbana
Diretór Agrikultura RAEOA, Amaro Efi, esplika insiativa kuda ai-oan ne’e nu’udar desizaun hosi Sekretária Rejionál ba Asuntu Agrikultura nian, katak, tenke fó prioridade atu hamatak ambiente iha Igreja sira.
“Programa ne’e importante, tanba agora tempu udan, ne’ebé ita kuda ai-oan hirak-ne’e bele moris bainhira to’o tempu bailoron, ai-oan sira-ne’e sei boot ona, no bele hamatak ambiente Igreja nian,” Amaro Efi, ko’alia iha Parókia Numbei Oé-Cusse.
Amaro Efi, informa, programa ne’e sei iha nia kontinuasaun, tanba ohin kuda ai-oan 70 iha parókia Numbei, semana oin sei kuda tán iha parókia Padiae no Igreja tuan.
“Bainhira ita kuda hotu ona iha parókia sira, ita sei kontinua tán kuda iha kapela sira, tanba programa ne’e nia objetivu atu hamatak ambiente Igreja nian,” nia informa.
Iha biban, ne’e Padre Vigário Parokia Igreza Nossa Senhora do Rosário Numbei, Florindo de Jesus, apresia no kontente ho atividade ne’e.
“Ami kontenti ho inisiativa ne’e, tanba ho atividade ne’e maka bele hamatak no hafurak liután ita-nia parókia,” nia orgullu.
Notísia relevante:Rogério Lobato nomea Amaro Efi lidera Agrikultura Oé-Cusse
Entretantu, ai-oan ne’ebé kuda iha Igreja Parókia Numbei hamutuk 70 ne’e ho tipu haat hanesan ai-mahoni, haliporto, palem-raza no ramos.
Jornalista: Abílio Elo Nini
Editór: Evaristo Soares Martins
