OÉ-CUSSE, 20 fevereiru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, nomea Amaro Efi, nu’udar Diretór hodi lidera Diresaun Rejionál Agrikultura iha Oé-Cusse, troka diretór sesante Cirilo dos Remédios Baba.
Dokumentu ofisiál ne’ebé Agência Tatoli, asesu, Prezidente Autoridade RAEOA, hasai karta nomeasaun ne’e ho númeru ofísiu, 03/II/2024/PA/RAEOA-TL, bazea ba artigu 24, númeru 1, alinea R ho dekretu-lei númeru 5/2015, loron 22, fulan-janeiru.
Notísia relevante: Funsionáriu 86 iha agrikultura Oé-Cusse servisu ho voluntáriu
Baze ne’e aprova iha estatutu RAEOA, alinea A artigu 22, lei númeru 3/2014, loron 18 fulan juñu, hodi ezonera Diretór sesante, Cirilo dos Remedios Baba, hodi nomeia fali Amaro Efi, ba mandatu tinan lima, 2024 to’o 2028.
Iha serimónia hand over, Amaro Efi, promete, sei servisu hamutuk ho dirijente másimu iha Autoridade RAEOA hodi garante prosesu servisu nune’e bele mellora no kualifika atendimentu iha agrikultura Oé-Cusse ho prósperu.
“Promove kooperasaun, entre diretór foun ho xefe departementu sira hotu, tanba mesak funsionáriu públiku, tanba durante ne’e ami hanesan uma fukun ida, nune’e koopera malu ne’e importante atu hadi’a servisu iha Diresaun Rejionál Agrikultura,” Amaro Efi, relata iha ámbitu serimónia hand over, iha salaun agrikultura Oé-Cusse, tersa ne’e.
Nia fundamenta, kargu ne’e hanesan konfiansa ida, la’ós oportunidade maibé hanesan responsabilidade ida ba líder foun atu kontinua servisu ne’ebé iha ajenda ona.
Tán ne’e, nia promete, sei koopera ho xefe departementu sira hotu, atu kontinua programa prioridade sira, ne’ebé líder sesante planeia ona, presiza kontinua tanba hanesan programa sustentabilidade.
“Pekuária, programa floresta nian, alimentár no irrigasaun, kona-bá irrigasaun durante ne’e hetan estragu, oinsá bele servisu hamutuk ita bele halo manutensaun no natar sira-ne’ebé presiza irrigasaun foun, ita tenke kontinua,” nia promete.
Notísia relevante:CLN koordena Agrikultura Oé-Cusse atu prepara produtu lokál variedade neen
Diretór sesante, Cirilo dos Remédios Baba, espera, iha futuru mantein koordenasaun, tanba iha agrikultura servisu tékniku, entaun kooperasaun ne’e importante, intermu ho parseiru dezenvolvimentu sira.
“Kestaun atu sa’e tún normál, maibé importante maka servisu hamutuk, unidade liuhosi liña koordenasaun hodi mellora servisu agrikultura iha Oé-Cusse,” nia katak.
Cirilo dos Remédios Baba, asumi kargu nu’udar Diretór Diresaun Rejionál Agrikultura, hahú kedas iha 2015 no termina iha janeiru 2024, ne’ebé troka hosi Amaro Efi, nu’udar funsionáriu públiku iha Diresaun Rejionál Agrikultura Oé-Cusse.
Notísia relevante: Agrikultura Oé-Cusse aloka $10,750.00 kompra fini ai-oan ba sentru viveru haat
Jornalista: Abílio Elo Nini
Editór: Evaristo Soares Martins
