iklan

POLÍTIKA

Bankada Governu iha PN hakruuk ba desizaun Tribunál Rekursu

Bankada Governu iha PN hakruuk ba desizaun Tribunál Rekursu

Deputadu Partidu Congresso Nacional de Reconstrução Timorense (CNRT), Patrocínio dos Reis Fernandes. Imajen/Mídia SEKOMS.

DILI, 21 fevereiru 2024 (TATOLI)—Vise bankada CNRT no hanesan mós Prezidente Komisaun A trata asuntu Justisa no Konstituisionál iha Parlamentu Nasionál (PN), Deputadu Patrocínio dos Reis Fernandes, hakruuk ba desizaun Tribunál Rekursu (TR) ne’ebé deklara inkonstituisionalidade ba artigu 6, artigu 7 alínea 1, 4 no 5 ho artigu 9 hosi lei númeru 20/2023, Lei Konsensaun Indultu no Komutasaun Pena.

Notísia Relevante: TR deklara inkonstitusionalidade ba alterasaun Lei Indultu no Komutasaun Pena, PPN: La’ós lei hotu

“Buat sira kona-ba lei kompeténsia atu deklara katak, lei ne’e konstituisionál ka inkonstituisionál ne’e Tribunál, ne’ebé Tribunál ezerse ona funsaun buat hotu hakruk ba desizaun ida ne’e,” Prezidente Komisaun A ne’e hateten ba jornalista sira iha Parlamentu Nasionál, kuarta ne’e.

Hakruuk ba desizaun ne’ebé iha ne’e mak prinsípiu bankada Governu ne’ebé aprezenta projetu-lei ne’e to’o ikus transforma nu’udar lei ida-ne’e, mai ho hanoin no prinsípiu oinsá mak bele kumpre ba konstituisaun repúblika iha artigu 85. Nune’e, labele limita fila-fali kompeténsia Prezidente Repúblika (PR) nian ne’ebé hatuur iha konstituisaun rasik kona-ba kompeténsia atu fó indultu ka konsesaun ba sidadaun hotu ne’ebé hetan kondisaun kastigu.

Nia hatutan, Parlamentu Nasionál ezerse nia funsaun ida nu’udar lejisladór halo lei no Tribunál mak iha kompeténsia atu interpreta katak, lei sira-ne’e hakruuk ba konstituisaun ka lae, ne’e TR mak iha kompeténsia atu hateten ida ne’e.

“Se Tribunál hateten ona, ne’e iha artigu sira-ne’ebé hanesan iha akordaun ne’e iha artigu tolu hanesan artigu 6, parte balun hosi artigu 7 alínea 1, 4 no 5 ho artigu 9 hosi lei ida-ne’e mak Tribunál deklara inkonstituisionalidade, entaun hotu-hotu tenke hakruk ba akordaun ne’e,” nia hateten.

Prezidente Komisaun A ne’e seida’uk tó komentáriu kona-ba ho artigu sira-ne’ebé TR deklara inkonstituisionalidade, tanba ba oin PN atu haree fila-fali hodi halo alterasaun.

“Ha’u seida’uk iha komentáriu kona-ba ida ne’e, maibé agora ne’e atu haree katak se bainhira Tribunál deklara matéria artigu balun inkonstituisionál iha lei ida, parte sira-ne’ebé Tribunál deklara inkonstituisionál ne’e mak labele aplika no restu nafatin kontinua aplika,” nia hateten.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!