iklan

COVALIMA

Grupu hitu sai ona benefisiáriu ba programa auto-empregu husi SEFOPE

Grupu hitu sai ona benefisiáriu ba programa auto-empregu husi SEFOPE

Manu-Rade.

COVALIMA, 21  fevereiru 2024 (TATOLI)  –  Sekretaria Estadu Formasaun Profisionál no Empregu (SEFOPE) liuhusi programa auto empregu iha 2023 apoia orsamentu $ 42.445,50 ba grupu hitu hodi hala’o negósiu iha Covalima.

Diretór SEFOPE munisípiu Covalima, Sérgio Amaral, hatete grupu hitu ne’e hala’o atividade negósiu hanesan prodús batako hetan orsamentu $8.140, karpintaria $4.084, ofisina $5.534,5, kuda modo $7.162, hak’iak Manu-Rade $3.330, akikultura $8.835 no loke alfaiate $5.360.

“Ita haree dadaun sira-nian atividade la’o hela no iha 2024 ita seidauk fó apoiu ba grupu sira, tanba seidauk simu proposta foun no sei hein orientasaun husi SEFOPE nasionál atu fó sai avizu”, Sérgio Amaral hatete iha Tabakolot, ohin.

Polítika Governu nian hodi fó apoiu liuhusi programa auto-empregu ne’e ho objetivu mak atu tulun sira hodi kria serbisu ba sira-nian aan rasik. Kritéria atu fó apoia ba grupu sira mak tenke foti formuláriu hodi halo rejistu iha SEFOPE durante fulan ida hafoin submete sira-nian proposta hodi halo selesaun.

Xefe grupu Gruhimodi ne’ebé haki’ak Manu-Rade, Mário Mesquita Martins, dehan, dadaun ne’e grupu haki’ak Manu-Rade hamutuk 34 ne’ebé balun fa’an ona, nune’e lori osan refere sosa fali mákina dulas no prodús hahán, sosa simentu, pregu no seluk tan hodi hadi’ak fatin ba manu sira ne’e.

Nia salienta liuhusi kria grupu ida ne’e bele benefisia ba aan rasik bainhira fa’an Manu-Rade hirak ne’e tanba osan balun rai iha kofre, balun lori sosa nesesidade grupu, maibé dadaun seidauk iha osan ne’ebé rai, tanba foin hetan apoiu iha tinan kotuk liubá.

Grupu Gruhimodi ne’ebé haki’ak Manu-Rade ne’e kompostu husi ema na’in-lima, feto ida no mane haat.

Notísia relevante: SEFOPE apoiu fundu ba grupu auto-empregu 44

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!