iklan

EKONOMIA, HEADLINE

Grupu ortíkola iha munisípiu ualu simu fini modo kilógrama 60 husi MAPPF

Grupu ortíkola iha munisípiu ualu simu fini modo kilógrama 60 husi MAPPF

Agrikultór kuda hela fini modo. Imajen/Espesiál

DILI, 21 fevereiru 2024 (TATOLI) – Orsamentu atu sosa fini modo hodi apoia ba grupu ortíkola la sufisiente maka Diresaun Nasionál Agrikultura no Ortikultura disponibiliza, iha tinan ne’e, fini kilógrama 60 ba grupu agrikultór 20 de’it husi munisípiu ualu.

Diretór Nasionál Agrikultura no Ortikultura husi Ministériu Agrikultura, Pekuária, Peska no Floresta (MAPPF), Lúcio Romeo Ribeiro, informa, tinan ida ne’e, diresaun iha de’it orsamentu rihun $300 no verba ne’e la’ós aloka de’it ba atividade ortikultura nian, maibé fahe ba parte tolu tanba ne’e konsidera ki’ik liu.

“Ita labele kobre setór ortikultura iha munisípiu hotu, entaun ita define fó prioridade ba munisípiu ualu de’it iha tinan ida ne’e”, Lúcio Ribeiro hatete iha Comoro, ohin.

Grupu ne’ebé maka diresaun disponibiliza ona fini modo atu kuda iha rai potensiál sira ne’e maka iha Aileu iha grupu ortikultura rua, Ainaro haat, Ermera rua, Baucau tolu, Covalima tolu, Dili tolu, Manatuto rua no Lautém ida.

Dirijente ne’e esplika katak razaun apoia grupu sira iha munisípiu refere tanba sempre fornese modo ho kuantidade di’ak ba iha merkadu no planu diresaun nian sei kontinua fó fini ba sira, nune’e kuda nafatin modo hodi hatama ba supermerkadu sira iha Dili. Aleinde ne’e, liuhusi atividade ortikultura bele fó lukru ba sira, nune’e bele sustenta nesesidade família nian.

Modo ne’ebé maka grupu sira prodús no fornese ba merkadu maka hanesan modo mutin no metan, repollu, alfase, tomate no pimentaun. “Husi fini modo sira ne’e, bainhira grupu sira kuda, sira kolleta hodi lori bá fa’an iha merkadu, depois maka aprezenta ninia relatóriu ba diresaun, nune’e bele kontinua hetan apoiu. Ita tulun fini ho fundu ba sira, depois maka sira halo jestaun no nia rezultadu maka tenke relata fali mai ita”, esplika.

Fini modo ne’ebé diresaun disponibiliza ba grupu sira ne’e sosa husi Indonézia. Aleinde diresaun fó fini, disponibiliza mós fundu ne’ebé ho montante lahanesan. Grupu 19 mak hetan hetan kada rihun $2 no ida maka hetan rihun $5, tanba ninia área kultivu boot liu. Grupu ne’e aleinde kuda modo, kuda mós ai-fuan hanesan saburaka.

Lúcio Ribeiro salienta katak, ba tinan oin, bainhira hakarak dezenvolve setór ortikultura ho di’ak maka pelu menus prevee millaun $1, nune’e bele kobre hotu ona área potensiál sira ne’ebé maka eziste iha munisípiu sira hotu.

Xefe grupu Hohorai Ki’ik husi Ainaro-Maubisse, Aguira da Conceição, hatete fini ne’ebé diresaun apoia ba sira iha janeiru ne’e nia rezultadu daudaun kolleta ona no lori bá fa’an ona iha merkadu Taibessi ho butuk ida $10 no balun hatama iha supermerkadu iha Dili.

“Ami lori mai fa’an ninia rezultadu hodi sustenta nesesidade família nian. Agora, diresaun hetan de’it maka relatóriu katak fini ne’ebé sira fó ne’e ami uza duni ho responsabilidade hodi kuda iha ami-nian to’os sira”, realsa.

Notísia relevante: MAPPF kada tinan sosa fini modo hosi Indonézia

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!