DILI, 20 dezembru 2023 (TATOLI)—Diretór Nasionál Agrikultura no Peska Ortikultura, Lúcio Ribeiro, hateten, tinan 20 ona Ministériu Agrikultura Pekuária Peska no Floresta (MAPPF) sosa fini modo hosi Indonézia.
“Ministériu kada tinan sempre sosa fini hosi rai-li’ur tanba iha rai-laran la halo produsaun fini, razaun limitasaun orsamentu no rekursu, entaun ita sosa hosi rai-li’ur hodi halo distribuisaun ba grupu ka pesoál sira ne’ebé hakarak kuda modo,” Diretór informa ba Agência Tatoli, iha ninia knaar fatin, Comoro, kuarta ne’e.
Haree ba situasaun ne’e, semana ba kotuk profesór sira hosi Indonézia mai fó formasaun ba tékniku na’in-neen iha setór ortikultura kona-ba crop cutting, ne’ebé ninia rezultadu maka ortikultura no ai-fuan.
Notísia relevante : MAP fahe fini batar no hare kulit 300 tonelada iha tinan 2022
Nia dehan, tékniku ne’ebé hetan ona formasaun sei prepara ba munisípiu sira hodi fó fali formasaun ba extensionista hamutuk 350 kona-ba rekolla dadus, crop cutting no seluk tan.
Ministériu iha tinan kotuk prevee orsamentu $74.000 no tinan ne’e $59.000 hodi sosa fini modo hosi rai-li’ur.
Fini ne’ebé Governu sosa mak hanesan brinjela, tomate, kanku rai-maran, ai-manas no seluk tan.
Haree ba kada tinan Governu sempre sosa fini hosi rai-li’ur maka daudaun ne’e MAPPF mós planeia ona atu futuru bele prodús rasik fini maibé iha prosesu laran tanba atu prodús fini ne’e la fasil.
“Fini modo ne’ebé ita fahe ba komunidade ne’e ita la husu fali osan ruma ka hetan reseita ruma hosi ne’e maibé ita ajuda fahe de’it hodi sira kuda no bele han no fa’an hodi sustenta sira-nia moris,” nia tenik.
Jornalista : Arminda Fonseca
Editora : Julia Chatarina
