DILI, 21 fevereiru 2024 (TATOLI)–Primeiru-Ministru (PM), Kay Rala Xanana Gusmão, kuarta ne’e, simu vizita hosi Embaixadór Repúblika Moçambique naun Rezidente, Belmiro José Malate.
Hafoin hasoru malu, Embaixadór konsidera katak Timor nu’udar maun alin povu Moçambique nian, tanba ne’e ho prezensa ne’e hodi reafirma kompromisu sira, liu-liu iha área edukasaun.
“Prezensa ha’u nian hodi hasoru malu ho Primeiru-Ministru hodi promove liután relasaun amizade entre Moçambique no Timor-Leste. Durante enkontru diskute asuntu sira ligadu ho kooperasaun entre país rua. Ami mós troka hanoin ba malu ligadu ho formasaun ba profesór portugés ne’ebé sai hanesan dezafiu boot ba Timor-Leste iha ensinu lian portugés. Tanba ne’e Moçambique sei serbisu hamutuk ho Governu Timor hodi kapasita profesór sira hodi bele mellora lian portugés,” Belmiro hateten iha Palásiu Governu.
Notísia relevante : PM Xanana simu vizita Konselleiru Fransa no Embaixadór Mpetjane
Atu konkretiza programa ne’e, Embaixadór rasik sei hasoru malu ho membru Governu relevante hodi haree área prioritáriu sira.
Aleinde ne’e, Moçambique mós prontu atu apoia iha kapasitasaun kuadru tanba país ne’e rasik iha esperiénsia no kapasidade hodi ajuda Governu Timor forma ninia kuadru sira.
Parte rua ne’e ko’alia mós kona-ba rekursu naturál hanesan gás no mina ne’ebé Timor-Leste mós nu’udar nasaun produtór ba rekursu ne’e.
“Ami ko’alia mós área sira ba interese hotu nian hanesan rekursu naturál tanba Moçambique nu’udar país produtór ba gas naturál no Timor-Leste mós nu’udar nasaun produtór ba rekursu naturál liu-liu gas no minarai, ne’ebé iha kooperasaun serbisu sira hodi bele dezenvolve liután área importante ne’e,” nia tenik.
Embaixadór no Xefe Ezekutivu troka hanoin mós kona-ba situasaun ekonomia no polítika rai-laran.
Jornalista : Antónia Gusmão
Editora : Julia Chatarina