COVALIMA, 22 fevereiru 2024 (TATOLI) – Atu implementa kámara munisipál maka Administrasaun Munisípiu Covalima (AMC), liuhusi Planu Dezenvolvimentu Integradu Munisipál (PDIM) sei konstrui jardín no reabilita muru protesaun.
“Ita-nian preparasaun atu implementa kámara munisipál tenke hadi’a uluk kondisaun edifísiu Administrasaun Munisípiu Covalima ho rápidu, tanba agora veíkulu Estadu para la estruturadu tanba laiha parajen”, Diretór PDIM Covalima, Carlito Barros Reis, dehan ohin.
Nia esplika, tuir loloos PDIM implementa projetu ne’ebé foku iha suku no área urbana, maibé molok bá suku no aldeia tenke haree lai kondisaun edifísiu sira iha kapitál munisípiu nian, tanba planu atu konstrui jardín munisipál no reabilitasaun muru protesaun ne’e hein de’it ona administradór foun atubele aprova rezultadu selesaun dokumentu husi empreza 25 ne’ebé mak durante ne’e submete ona sira-nian dokumentu iha 2023.
Bazeia ba rezultadu, empreza 15 mak hetan klasifikasaun A no 13 hetan B no rua la pasa iha selesaun dokumentu, tanba balun laprienxe rekizitu no seluk dokumentu kaduka.
“Atu konstrui jardín no reabilita moru protesaun iha administrasaun Covalima nia dezeñu ho BoQ preparadu, maibé iha trimestre dahuluk la konsege implementa mak sei implementa iha trimestre daruak”, dehan.
Planu asaun anuál ba PDIM iha nia programa dezenvolvimentu rurál no urbana iha 2024 iha nia orsamentu hamutuk $564.303, husi orsamentu ne’e prevee ba kontrusaun no reabilitasaun jardín munisípiu ho verba $155.79 no aloka ba konstrusaun no reabilitasaun muru protensaun $83.440.
Tuir dadus, iha tinan 2024, Planu Dezenvolvimentu Integradu Munisipál implementa projetu hamutuk ualu ne’ebé nia totál orsamentu hamutuk millaun $1,35 ho nia tipu projetu mak konstrusaun muru haleu Servisu Munisipál Obra Públika no Transporte ho nia valór orsamentu $83.440,47, rezidénsia ba médiku sira iha suku Holpilat $473.657,35, konstrusaun salaun enkontru Postu Administrativu Fohorem $132.923,43, rekonstrusaun fatin turizmu iha Lakirin iha suku Holpilat, postu Maucatar hamutuk $155.798,80.
Konstrusaun laboratóriu Sentru Saúde Komunitáriu (SSK) Zumalai iha suku Zulo $87.022,60, harii Eskola Bázika Filiál iha suku Matai, postu Maucatar ho montante $87.931,39, konstrusaun kanál irrigasaun husi Bauraikun, iha aldeia Kulu-oan, suku Tashilin, postu Zumalai $192.141, no konstrusaun merkadu iha suku Camnasa, postu Suai $137.278,18.
Notísia relevante: Autoridade Covalima sensibiliza matadalan ba elaborasaun PDIM
Jornalista: Celestina Teles
Editora: Maria Auxiliadora
