DILI, 22 fevereiru 2024 (TATOLI)–Primeiru-Ministru (PM), Kay Rala Xanana Gusmão, hala’o enkontru ho delegasaun investidór Makati City Firim hosi Filipina, ne’ebé hala’o vizita mai Timor-Leste ho objetivu atu esplora oportunidade loke investimentu.
Iha enkontru ne’e, Xefe Governu introdús kona-ba programa IX Governu no aprezenta lei investimentu ne’ebé fó garantia ba empreza internasionál atu loke investimentu hodi kontribui ba ekonomia Timor-Leste.
Xefe delegasaun investidór Makati City hosi Filipina, Martin Subido, agradese no introdús sira-nia profile kompañia ne’ebé iha ona espriénsia tinan barak iha Filipina, ne’ebé hatudu interese atu buka hatene kona-ba diresaun sira ne’ebé bele halo ligasaun no kooperasaun iha área relevante sira, hanesan produsaun enerjia renovável, dezenvolvimentu jestaun enerjia solár renovável 10 to’o 20 MW tuir kontratu fornesimentu ho Timor no halo jestaun dezastre, fornesimentu ekipamentu teknolojia no seluk tan.
“Prevelejiu tebes mai ami bele hasoru malu ho Primeiru-Ministru Xanana Gusmão, ami hala’o surumutu atu ami bele hetan orientasaun no inspirasaun hosi nia, no atu buka hatene kona-ba oportunidade sira ne’ebé bele mosu kona-ba dezenvolvimentu no progresu ekonómiku iha Timor-Leste. Ami hanesan emprezáriu no investidór sira bele sai parseiru di’ak ho Govenu Timor-Leste, ami agradese ba Governu ida-ne’e no ami fiar duni katak ho kooperasaun ida-ne’e, ita bele harii nasaun ne’ebé di’ak liu hodi la’o ba oin,” Xefe Delegasaun Investidór Makati City, Martin Subido, relata hafoin hasoru PM Xanana, iha Palásiu Governu, kinta ne’e.
Notísia relevante : PM Xanana: nasaun 11 hakarak mai halo investimentu iha Timor-Leste
Delegasaun ne’e iha ona espriénsia serbisu harii infraestrutura báziku no turizmu nian iha Labuan Bajo, Indonézia no nasaun seluk tan.
Delegasaun investidór Makati City sei hasoru malu mós ho Prezidente Repúblika, José Ramos Horta, Ministru Prezidénsia Konsellu Ministru, Agio Pereira, Ministru Petróleu no Rekursu Minerál, Francisco Monteiro, Ministru Planeamentu Investimentu Estratéjiku, Gastão de Sousa, Ministru Obra Públika, Samuel Marçal, Ministra Finansa, Santina Cardoso, Governadór Banku Sentrál Timor-Leste (BCTL, sigla portugés), Helder Lopes no entidade Banku Nasionál Komérsiu Timor-Leste (BNCTL, sigla portugés) hodi esplika kona-ba garatia finaneiru atu loke investimentu iha Timor-Leste.
Jornalista : Antónia Gusmão
Editora : Julia Chatarina
