DILI, 22 fevereiru 2024 (TATOLI) – Primeiru-Ministru (PM), Kay Rala Xanana Gusmão, hateten, nasaun hamutuk 11 fó konfiansa ba Timor-Leste hodi mai halo investimentu iha área oioin.
“Semana ne’e, Embaxadór hosi nasaun hamutuk 11 mak mai halo enkontru ho Prezidente Repúblika (PR) enkontru mós ho ha’u sira tau konfiansa tebes ba Timor-Leste atu mai hala’o investimentu, no kooperasaun iha área oioin,” Xefe Governu hatete ba jornalista iha Palásiu Prezidensiál, kinta ne’e.
Tanba ne’e, PM Xanana orienta ona ba membru Governu hotu atu prepara aan atu simu investimentu no kooperasaun ne’ebé nasaun amigu sira sei halo ho Timor-Leste.
“Ha’u orienta ba Ministériu sira hotu iha área sira ne’ebé nasaun sira atu kontribui, hanesan, balun iha industria, edukasaun, saúde, formasaun rekursu umanu no seluk tan. Embaxadór sira ne’e mai balun la’o haleu Timor sira admira no interese atu koopera ho ita tanba ita nia demokrásia ne’ebé maka’as, ita hanesan rai ida ne’ebé rekonsiliasaun di’ak,” nia katak.
Embaixadór hosi nasaun 11 ne’ebé hasoru ona Xefe Estadu no Xefe Governu mak;
- Yasser Hassan Farag Elshemy, Embaixadór Estraordináriu no Plenipotensiáriu Repúblika Arab Ejitu ne’ebé rezidénsia iha Jakarta – Indonesia;
- Jess Dutton, Embaixadóra Estraordinária no Plenipotensiária Kanada nian ne’ebé rezidénsia iha Jakarta – Indonesia;
- Sten Frimodt Nielsen, Embaixadór Estraordináriu no Plenipotensiariu Dinamarka, rezidénsia iha Jakarta – Indonesia;
- Georgios Dogoritis, Embaixadór Estraordináriu no Plenipotensiáriu Repúblika Hellenic (Grece) ne’ebé rezidénsia iha Singapura;
- Mohammad Boroujerdi, Embaixadór Estraordináriu no Plenipotensiáriu Repúblika Islamika Iran ne’ebé rezidénsia iha Jakarta – Indonesia;
- Ameer Khurram Rathore, Embaixadór Estraordináriu no Plenipotensiáriu Repúblika Islamika Pakistaun ne’ebé rezidénsia iha Jakarta – Indonesia.
- Tean Samnang, Embaixadór Estraordináriu no Plenipotensiáriu Reinu Kamboja nian ne’ebé rezidénsia iha Jakarta – Indonesia.
- Khamfeuang Phanthaxay, Embaixadór Estraordináriu no Plenipotensiáriu Repúblika Demokratika Povu La’o ne’ebé rezidénsia iha Jakarta – Indonesia.
- Nor Eddine Benfreha, Embaixadóra Estraordináriu no Plenipotensiáriu Repúblika Demokratika Povu Algeria ne’ebé rezidénsia iha Canberra – Australia.
- Mpetjane Kgaogelo Lekgoro, Embaixadór Estraordináriu no Plenipotensiáriu Repúblika Afrika Sul ne’ebé rezidénsia iha Jakarta – Indonesia.
- Daniel blockert, Embaixadór Estraordináriu no Plenipotensiáriu Suesia ne’ebé rezidénsia iha Jakarta – Indonesia.
Adezaun ba OMK no ASEAN
Líder Ezekutivu ne’e mós afirma: “Durante enkontru ho Prezidente ami ko’alia mós kona-ba situasaun sira hotu oinsá mak ita atu adere ba Organizasaun Mundiál Komersiu (OMK) no ASEAN. Ita hanesan nasaun foun ita tenke prontu hasoru dezafiu iha situasaun saida de’it, oinsa ita tama ona ba membru iha OMK no ASEAN saida mak ita sei halo,” Xanana afirma
Tuir nia, dezafiu seluk ne’ebé Timor-Leste enfrenta mak oinsa atu konvense nasaun membru ASEAN hotu atu simu Timor-Leste.
“Maibé ita nafatin haree hodi servisu makas atu to’o iha ita nia objetivu,” PM promote.
Dezenvolve setór turizmu
Entretantu, Xefe Governu kompromete prepara kondisaun sira hodi bele dezenvolve setór turizmu iha Timor-Leste.
“Ita nia rai furak ba turizmu, maibé atu to’o iha ne’ebá ita sei prepara uluk kondisaun mak foin bele dezenvolve setór turizmu, tanba atu dada turista sira mai la’ós han fali supermie, ida ne’e mak ita sei haree, se ema mai mak han de’it supermie entaun sira iha Bali de’it,”katak.
PM Xanana louva mós ba inisiativa Prezidente Repúblika hodi organiza resesaun diplomátika hodi halibur Embaixadór sira ne’e dalan id aba promove turizmu tanba sira mai partisipa no han ai-han Timor.
“Resesaun ne’ebé foin lalais Prezidente halo kapas tebes, ida ne’e hatudu katak ita iha kbi’it atu dezenvolve ita nia ai-han lokál sira, ba oin ita kontinua halo nafatin, nune’e dezenvolve setór turizmu,” nia katak.
Governante ne’e mós konsiente katak presiza duni hadi’a kondisaun liuliu setór privadu sira oinsa hasa’e produsaun rai laran no setór privadu sira mak halo produsaun ba produtu lokál sira.
“Governu ida ne’e haree hotu mak antes tama ba to’o turizmu ita hadi’a uluk kondisaun hanesan prodús produtu lokál sira hanesan aidila, hudi sai ba bebida, atu nune’e turista sira mai hemu buat ne’ebé ita nian duni. Iha área rurál sira ho turizmu ne’ebé di’ak ita tenke prepara mós kondisaun atu nune’e ema ba iha kondisaun ne’ebé di’ak,” PM Xanana konklui.
Notisia relevante: PM Xanana simu vizita Konselleiru Fransa no Embaixadór Mpetjane
Jornalista: Hortencio Sanchez
Editór : Florencio Miranda Ximenes
