DILI, 22 fevereiru 2024 (TATOLI)–Insitutu Nasionál Seguransa Sosiál (INSS) daudaun ne’e loke ona vaga ba pesoál hodi reforsa serbisu instituisaun iha postu administrativu sira.
“Ita hahú loke vaga ba públiku horibain rua, hodi halo rekrutamentu ba pesoál hamutuk 42 hodi destaka ba postu administrativu sira iha territóriu laran atu haforsa serbisu instituisaun iha terrenu tanba daudaun ita menus rekursu umanu,” Prezidente INSS, Arlindo Pinto, informa ba Agência Tatoli, iha ninia knaar fatin, Caicoli, kinta ne’e.
Objetivu loke vaga tanba funsionáriu sira iha munisípiu sira menus, nune’e labele kontrola ho di’ak.
“Ita rekoñese iha munisípiu balun idozu sira balun mate ona maibé líder komunitáriu la informa ba pesoál INSS, entaun pagamentu kontinua la’o. Ida-ne’e hatudu falta koordenasaun tanba loloos sira mak tenke informa ba ita tanba sira mak hatene komunidade hira mak moris no mate, Governu só fasilita pagamentu,” nia akresenta.
Notísia relevante : PM husu Prezidente INSS ho estrutura serví povu ho domin
Nia husu tulun ba líder komunitáriu sira iha munisípiu, postu administrativu no suku sira atu kolabora ho funsionáriu sira fó informasaun iha kualker tempu relasiona ho pensaun sosiál nian.
“nune’e benefisiáriu ne’ebé mate ona, laiha ema ida mak bele reprezenta tan hodi simu,” nia akresenta.
Aleinde ne’e, institutu daudaun halo hela planu kalendáriu ida atu la’o hamutuk ho Ministériu Administrasaun Estatál (MAE) hodi halo diálogu komunitáriu ho xefe suku sira nune’e bele fó informasaun detallu ba sira nune’e bele iha kolaborasaun serbisu di’ak ba atendimentu pagamentu sira.
“Ita-nia planu ne’ebé sei hala’o tinan ne’e hafoin pagamentu idozu no invalidez faze dahuluk maka kontinua kedas hala’o ida-ne’e iha territóriu laran,” Prezidente INSS tenik.
Jornalista : Arminda Fonseca
Editora : Julia Chatarina
