iklan

COVALIMA

Membru KJDS suku tolu partisipa formasaun hodi presta primeiru sokorru

Membru KJDS suku tolu partisipa formasaun hodi presta primeiru sokorru

Membru KJDS suku tolu  partisipa formasaun kona-ba halo atendimentu primeiru sukorru. Imajen/Celestina Teles.

COVALIMA, 22 fevereiru 2024 (TATOLI) – Autoridade Protesaun Sivíl ( APC, sigla portugés) hamutuk ho Bombeiru Covalima disponibiliza formasaun kona-ba oinsá presta primeiru sokorru no konseitu dezastre naturál ba membru Konsellu Jestaun Dezastre Suku (KJDS) husi Suai Loro, Maudemo no Casabauk.

“Ita fasilita formasaun kona-ba primeiru sukorru, nune’e bainhira akontese dezastre naturál membru konselu suku iha ona koñesimentu, tanba sira balun foin mak eleitu. Bainhira akontese  dezastre ruma karik sira presiza kontaktu uluk mak sé no saida mak sira tenke halo molok ekipa husi APC no sesaun Bombeiru to’o iha fatin akontesimentu”, Komandante Bombeiru Covalima, Didi Alves Perreira, hatete iha Kampung Baru, ohin.

Durante ne’e, APC Covalima no Bombeiru disponibiliza ona formasaun ba membru KJDS ne’ebé enovolve husi estrutura suku sira iha postu administrativu Zumalai, Tilomar no Suai rasik no sei kontinua ba suku sira seluk.

Membru KJDS Suku Casabauk, Maria Noviana Felismina Madeira, hatete formasaun kona-ba dezastre naturál importante no nia bele fahe tutan informasaun ba komunidade sira, tanba tinan-tinan Covalima sempre akontese katástrofe no liuhusi atividade ne’e sira bele hatene atu salva uluk vítima sira bá fatin seguru, nune’e labele lakon vida.

Autoridade Protesaun Sivíl Covalima rejista, entre janeiru no fevereiru, família afetada ba dezastre naturál hamutuk 98. Tipu dezastre ne’ebé akontese mak hanesan ahi han uma ualu no anin sobu uma 90 ho nivél estragu aat totál 41, natoon ualu no kmaan 39.

Lembra katak Servisu Munisipál ba Jestaun Risku Dezastre Naturál Covalima identifika suku Suai Loro, Beco, Zulo, Raimea, Usecai no Mape risku ba dezastre naturál.

Notísia relevante: Suku neen iha Covalima risku ba dezastre naturál

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!