COVALIMA, 20 fevereiru 2024 (TATOLI) – Servisu Munisipál ba Jestaun Risku Dezastre Naturál (SMJRDN) Covalima identifika suku Suai Loro, Beco, Zulo, Raimea, Usecai no Mape risku ba dezastre naturál.
Diretór SMJRDN, João Martins, hatete, kada tinan, Covalima sempre akontese dezastre naturál, tanba ne’e presiza disemina informasaun kona-ba prevensaun no mitigasaun ba dezastre naturál ba komunidade sira.
“Sensibilizasaun informasaun hanesan parte ida atu hasa’e komunidade nia koñesimentu nomós fó apoiu emerjénsia ai-han no la’ós ai-han ba komunidade sira”, hatete iha Sukaer-Laran, ohin.
Daudaun ne’e, Servisu Munisipál ba Jestaun Risku Dezastre Naturál hahú halo ona koordenasaun ho parseiru mak hanesan Organizasaun Internasionál ba Migrasaun (IOM), Cruz Vermelha Timor-Leste (CVTL), World Vision no Care International ba atividade divulga informasaun sobre katástrofe no nia prevensaun sira.
Orsamentu Jerál Estadu (OJE) 2024 ne’ebé aloka ba SMJRDN hamutuk $156.402, husi verba ne’e prevee ba sub-programa mitigasaun no prevensaun hamutuk $100.102.
Autoridade Protesaun Sivil Covalima rejista família afetada ba dezastre naturál hamutuk uma-kain 98. Tipu dezastre ne’ebé akontese iha fulan-janeiru no fevereiru hanesan ahi han uma ualu no anin sobu uma 90 ho nivél estragu aat totál 41, natoon ualu no kmaan 39.
Notísia relevante: OIM disemina informasaun kona-ba risku dezastre naturál ba autoridade iha Covalima
Jornalista: Celestina Teles
Editora: Maria Auxiliadora
