MSSI lansa portál seguransa sosiál Timor-Leste
DILI, 22 fevereiru 2024 (TATOLI)—Governu liuhosi Ministériu Solidaridade Sosiál no Inkluzaun (MSSI), kinta ne’e, halo lansamentu ba portál seguransa sosiál Timor-Leste ho link https://segurancasocial.gov.tl/index.
“Lansamentu portál ho objetivu atubele transmite informasaun ba públiku, liu-liu ba sidadaun sira ne’ebé durante ne’e kontribui ba seguransa sosiál,” Ministra Solidaridade Sosiál no Inkluzaun, Verónica das Dores, informa, hafoin lansa portál, iha Suai Room, Timor Plaza.
Iha fatin hanesan, Prezidente Institutu Seguransa sosiál (INSS), Arlindo Pinto, relata, portál ne’e sei dezenvolve tan nia janela dijitalizasaun sira inklui ba rejistrasaun no kontribuisaun seguransa sosiál, inskrisaun levantamentu dadus no ba entidade sira ne’ebé mak atu halo levantamentu dadus hodi hetan sertifikasaun, liu-liu ba empregadór sira.
Notísia relevante : Prezidente INSS sei foku ba prioridade haat durante mandatu
Hosi portál ne’e benefisiáriu seguransa sosiál bele hatene halo kálkulu kontribuisaun durante serbisu.
“Ezemplu, ha’u nu’udar trablladór, ha’u tenke hatene ha’u-nia kontribuisaun ba seguransa sosiál, nune’e to’o tempu ida ha’u bele levanta filafali ha’u-nia kontribuisaun sira atu parte seguransa sosiál bele fó pensaun ne’ebé durante ha’u kontribui,” nia akresenta.
Rejistu online
Ferramenta seluk hosi portál ne’e mak fó mata-dalan ba ema atubele kontribui, rejistra no halo inskrisaun iha seguransa sosiál.
“Portál ne’e la’ós de’it ba kontribuente seguransa sosiál maibé mós ba sidadaun naun kontribuitivu sira, ezemplu ba benefisiáriu pensaun sosiál sira hosi munisípiu la presiza mai to’o iha Dili mak foti formuláriu atu priense, maibé agora sira bele halo rejistu liuhosi online tanba formuláriu sira agora ita inklui hotu iha portál atu sidadaun bele loke no prienxe rasik,” nia informa.
INSS sei dezenvolve portál ne’e iha faze rua, ne’ebé sei konfigura mós janela ida ba inskrisaun levantamentu dadus ba empregadór no trablladór sira inklui konfigura halo ligasaun entre INSS ho banku sira atu sidadaun kontribuiente no benefisiáriu sira durante ne’e ladún satisfaz ba atendimentu sira hosi seguransa sosiál, bele hato’o informasaun ruma liuhosi portál ne’e.
“Ita lansa portál ne’e tanba durante ne’e ita menus rekursu umanu halo sosializasaun ba prosesu sistema seguransa sosiál iha liña ministeriál inklui ajénsia nasionál no internasionál sira ne’e, entaun liuhosi lansamentu portál ne’e ema hotu bele asesu informasaun tanba antes ne’e serbisu manuál maibé agora bele liuhosi online, ida-ne’e mak diferente,” Prezidente institutu tenik.
INSS rejista traballadór rai-laran ne’ebé durante ne’e halo kontribuisaun ba seguransa sosiál hamutuk 147.000 resin.
“Iha tempu badak ami sei halo disaminasaun ba munisípiu atu ema hotu bele hatene no asesu portál ida-ne’e,” nia dehan.
Portál ne’e lansa ho kooperasaun serbisu ho parseiru dezenvolvimentu sira hosi Governu Portugal no Organizasaun Internasionál Traballu (OIT).
Jornalista : Arminda Fonseca
Editora : Julia Chatarina
