OÉ-CUSSE 23 fevereiru 2024 (TATOLI) – Autoridade Rejiaun Administrativa Espesiál Oé-Cusse AmbenO (RAEOA), liuhosi Asesór Asuntu Sosiál, Agustinho Caet hamutuk ho Asesór Asuntu Habitasaun, Rui Gonçalves, sesta ne’e, hala’o vizita ofisiál ba komunidade sira iha Citrana suku Bene-Ufe no suku Suni-Ufe sub-rejiaun Nítibe.
Notísia relevante:Autoridade Nitibe husu Guvernu konstrui postu UPF iha Fatusobe
Asesór Asuntu Sosiál, Agustinho Caet, informa, objetivu vizita ofisiál ne’e, nu’udar orientasaun hosi Prezidente Autoridade RAEAO, Rogério Tiago Lobato, atu observa kondisaun moris iha nivél suku liu-liu área rurál sira.
“Tanba agora ligasaun ho situsaun udan, entaun iha ba atu dada lia no rona sira nia preukupasaun ba kondisaun moris nian, no observa mos sira-nia hela fatin, nune’e iha futuru ita bele iha meiu atu fasilita apoia ba sira,” Agustinho Caet, ba Agência Tatoli, iha Oé-Cusse.
Asesór ne’e informa, atividade ne’e programa Autoridade RAEOA nian, hodi hasa’e dignidade moris povu Atoni, tanba bazeia ba estudu ne’ebé antes ne’e iha, hatudu katak komunidade Oé-Cusse, tama iha kategoria moris ki’ak, Má nutrisaun aas, no hela iha uma ho kondisaun aat no moris ho rendimentu ki’ik tebes.
“Entaun faze tuir ita sei hala’o vizita tán ba suku sira seluk iha sub-rejiaun Pássabe, Oésilo, no Nítibe sorin tan, atu hatene kondisaun moris komunidade nian,” nia informa.
Tanba antes ne’e, Governu no Estadu Timor-Leste, hamosu ona modelu dezenvolvimemtu foun ba Oé-Cusse ho alokasaun orsamentu boot, ho intensaun atu hadi’a moris, tan ne’e maka Autoridade RAEOA hakarak ba observa hodi hadi’a kbi’it-laek sira-nia hela fatin no fornese nesesidade bázika ba sira atu sira bele hatutan sira-nia moris ho dignu.
Xefe suku Bene-Ufe, Marcos Meni, hato’o agradese tanba vizita ne’e, hanesan polítika ida hosi Autoridade atu hatene kondisaun moris komunidade sira, nune’e bele tau iha planu ba futuru.
“Ita hatene, tanba autoridade foun ne’e hala’o servisu seidauk to’o fulan, entaun vizita ida-ne’e importante, tenki tun direita ba komunidade sira, atu hatene, kondisaun moris povu sira iha kraik, labele tur iha leten de’it maibé tenki tuun mai iha baze,” nia katak.
Notísia relevante:Autoridade RAEOA prioriza asuntu estabelesimentu suku foun iha Oé-Cusse
Jornalista: Abílio Elo Nini
Editór: Evaristo Soares Martins
