OÉ-CUSSE, 22 fevereiru 2024 (TATOLI) – Sekretáriu Rejionál ba Asuntu Administrasaun, Andre la’o, hateten, durante mandatu sei esforsa atu haree dokumentu suku hitu ne’ebé antes ne’e submete ona pedidu ba Ministériu Estatál atu sai suku foun iha Rejiaun Administrativa Espesiál Oé-Cusse Ambeno (RAEOA).
“Proposta kriasaun suku foun, antes ne’e, hato’o ona ministériu, ha’u sei haree asuntu ne’e, atu kontinua, tanba sei liga mós ho postu administrativu foun sira, ba futuru implementasaun podér lokál, ida-ne’e sai prioridade primeiru,” Andre La’o ba Agência Tatoli, iha Oé-Cusse, segunda ne’e.
“Tan ne’e ami sei esforsa atu vizita suku hotu-hotu, tanba prioridade IX Governu maka atu aselera podér lokál, entaun ita tenki haree suku sira, tanba antes ne’e iha sia hakarak sai suku foun, maibé ita sei haree prienxe rekizitu ka lae,” nia afirma.
Notísia relevante: Autoridade RAEOA sei restrinje sirkulasaun animál iha área urbana
Andre La’o, hateten, iha mandatu Autoridade anteriór, komunidade no autoridade lokál sira, barak maka hatama ona karta husu atu harii suku foun.
Tanba ho razaun suku balu antigu, suku balu nia área luan no akumula populasaun barak, afeta ba dezenvolvimentu ladún kobre hotu komunidade sira, ezemplu suku balu komunidade seidauk iha kartaun eleitorál no billete identidade.
“Ita sei haree ida-ne’e, sei tún ba suku idak-idak atu identifika prienxe ona rekezitu sira ka lae, tanba ne’e ita atu prepara ba iha futuru implementasaun podér lokál nian, atu sai suku tenke iha populasaun 3.000 ba leten no laiha problema ba kultura no baliza nian entaun ita sei halo ida-ne’e,” Andre La’o, hateten.
Objetivu atu hamosu suku foun ne’e, primeiru tanba distánsia dook tebes hosi sede suku, objetivu segundu, tanba kada tinan populasaun aumenta, entaun dezenvolvimentu ne’e balu ladún asesu, presiza aumenta tán suku.
Nia hateten, tuir lei númeru 9/2016, fulan jullu, kona-bá Lei suku, ne’ebé aprova iha loron 14 maiu 2016, iha artigu 3 (defifinisaun hosi suku), iha alinea 1, hateten, suku hanesan pesoa koletiva hosi direitu públiku ho natureza asosiativa, ne’ebé harii bazea ba sirkunstánsia istóriku, kulturál no tradisionál sira no sira-nia membru iha ligasaun liuhosi relasaun família ka hosi lasu tradisionál sira, iha fatin ne’ebé define.
Iha Alinea 2 haktuir, suku sira-ne’ebé eziste iha sidade hanesan pesoa koletiva hosi direitu públiku no natureza asosiativa ne’eb’e harii bazea ba prosesu sosiál no sitóriku, ne’ebé hetan marka hosi migrasaun hosi etnia oinoin.
Iha tempu kolonializasaun, ne’ebé mai hosi natureza familiár hosi lasu ne’ebé uluk iha, ne’ebé iha fatin ne’eb’e define.
“Ha’u-nia mandatu ha’u sei trata ida-ne’e ho didi’ak, tanba iha Oé-Cusse, suku balu aldeia to’o 10, entaun ita tenke fahe, importante prienxe rekizitu, tenke iha rekursu umanu natoon, rekursu naturál, fasilidade saúde, edukasaun no infraestrutura seluk, ita sei esforsa ba servisu ne’e,” nia informa.
Notísia relevante:Aldeia tolu iha Costa Oé-Cusse preparadu sai suku
Entretantu, antes ne’e suku hitu atu sai suku foun maka hanesan, iha sub-rejiaun Pante Makasar hanesan, suku Mone-Meko no Kutete hafahe hosi suku Costa.
Enkuantu suku Maunaebeno hafahe hosi suku Cunha, no suku Taiboko B hafahe hosi suku Taiboko.
Iha sub-rejiaun Oésilo, suku Bobometo A hafahe hosi suku Bobometo, iha sub-rejiaun Pássabe suku Haemnanu hafahe hosi suku Abani, no iha sub-rejiaun Nítibe suku Hao-Beno hafahe hosi suku Lela-Ufe.
Notísia relevante: MAE diálogu ho komunidade Monemeko Oé-Cusse prepara sai suku iha 2024
Joranlista: Abílio Elo Nini
Editór: Evaristo Soares Martins
