iklan

NASIONÁL, EKONOMIA, HEADLINE

Governu fó hanoin traballadór labele hafoer nasaun nia naran iha rai-li’ur

Governu fó hanoin traballadór labele hafoer nasaun nia naran iha rai-li’ur

Trabalaldór sira ne’ebé asina deklarasaun ho Governu molok desloka bá serbisu iha Austrália, iha salaun SEFOPE, Caicoli, sesta (23/02/2024). Imajen/Mídia SEFOPE

DILI, 23 fevereiru 2024 (TATOLI)–Governu liuhosi Diresaun Nasionál Empregu Estranjeiru (DNEE) hosi Sekretaria Estadu Formasaun Profisionál no Empregu (SEFOPE), sesta ne’e, hamutuk ho traballadór na’in-48 asina deklarasaun molok arranka bá serbisu iha Austrália.

Reprezentante SEFOPE, Jacinto Ribeiro Dias, hateten, Governu polítikamente buka dalan ba povu hotu forma iha liña ida de’it atu sai autór ba dezenvolvimentu.

“Governu halo jestaun hodi nia povu ba buka moris iha ema-nia rain hodi hadi’a ekonomia família no nasaun. Tanba ne’e tenke kumpre didi’ak kompromisu sira ne’ebé tau ona iha dokumentu nia laran, katak labele konsumu alkoólika, iha rai-laran inklina-an iha arte marsiál bainhira serbisu iha ema-nia rain tenke hakoi hela iha ita-nia rain, nune’e bá serbisu hatudu ita-nia komportamentu di’ak, bainhira ita-nia hahalok di’ak sei fó valór ba ita-nia an, família no nasaun,” Jacinto Ribeiro Dias, hato’o mensajen iha ámbitu asinatura deklarasaun entre traballadór ho Governu, iha salaun SEFOPE, Caicoli, sesta ne’e.

 Notísia relevante : Programa pilotu akompañamentu família válidu de’it ba traballadór PALM

Xefe Gabinete SEFOPE ne’e enkoraja mós traballadór sira ne’e atu hatoman-an moris iha sistema nia laran, hodi labele la’o sees hosi sistema ka regulamentu ne’ebé Estadu rua estabelese ona.

“Estadu la manán buat ida hosi traballadór sira maibé manán de’it mak bainhira traballadór sira hatudu komportamentu di’ak iha ema-nia rain,” nia akresenta.

Traballadór tenke sai embaixadór

Iha biban hanesan, Diretór Nasionál Empregu Estranjeiru interinu, Ângelo dos Santos Veloso, husu traballadór sira labele halo foer nasaun nia naran no tenke sai hanesan embaixadór hodi kuidadu Estadu nia naran nune’e labele taka dalan ba timor-oan sira ne’ebé sei iha oportunidade no hakarak bá.

“Imi (traballadór) reprezenta Timor-Leste iha Austrália hanesan embaixadór, tanba ne’e hatudu komportamentu di’ak. Kuandu hahalok di’ak maka sira sei fó kouta boot tan ba Timor atu nune’e fó oportunidade mós ba timor-oan sira seluk. Maibé ha’u fiar katak imi sei komporta imi-nia an ho di’ak liuhosi uniforme hanesan faru, xapeo ne’ebé imi uza ho símbolu bandeira RDTL,” Diretór Nasionál Empregu Estranjeiru interinu apela.

Nia husu mós ba família sira atu apoia serbisu ne’ebé traballadór sira halo durante iha rai-li’ur.

“Família tenke apoia másima tanba dalabarak SEFOPE sempre hasoru problema la’ós entre país maibé entre traballadór ho ninia família, ne’ebé husu ba traballadór atu hanoin nafatin família ne’ebé husik hela iha Timor, liu-liu feen ka laen,” nia tenik.

Asinatura deklarasaun entre traballadór ho Governu akompaña hosi Xefe Gabinete SEFOPE, Jacinto Ribeiro Dias, Diretór Nasionál Emprego Estranjeiru interinu, Ângelo dos Santos Veloso, no asiste hosi família traballadór nian.

Traballadór 48 ne’e kompostu hosi feto na’in-20 no mane ema na’in-28, ne’ebé traballadór sira ne’e rekrutadu hosi empreza australiana, Down to Earth no Sunray Strwberries.

Bazeia ba dadus hosi SEFOPE, daudaun rejista traballadór hamutuk 5.000 mak serbisu iha Austrália no traballadór hamutuk 1.000 mak serbisu ona durante tinan-tolu.

Jornalista     : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!