DILI, 23 fevereiru 2024 (TATOLI)—Segundu Sekretária Meza Parlamentu Nasionál (PN), Deputada Bendita Moniz Magno, hateten Governu indika no submete ona, Rui Pereira dos Santos, nu’udar kandidatu lista úniku ba Komisáriu Komisaun Anti-Korrupsaun (CAC, siglá portugés) ba Parlamentu Nasionál (PN).
Notísia Relevante: Governu retira kandidatu komisáriu CAC
“Governu haruka ona mai kandidatura ba iha komisáriu CAC, karta foin simu iha loron hirak liu ba. Governu haruka ema ida de’it nia naran mai Parlamentu, hotu-hotu hatene Governu haruka mak señor Rui (Pereira dos Santos) atu ba iha komisáriu CAC,” Segundu Sekretária Meza PN ne’e hateten ba jornalista sira iha PN, sesta ne’e.
Tanba ne’e, nia dehan, kinta (22/02/2024), iha reuniaun líder bankada ne’ebé lidera hosi Primeiru Vise Prezidente PN, Maria Teresinha Viegas, hato’o ona kandidatu komisáriu CAC ne’ebé Governu aprezenta hodi bele rona hanoin sira hosi líder bankada parlamentár sira.
Maibé, iha reuniaun marka de’it prezensa hosi vise bankada no laiha xefe bankada so iha de’it xefe bankada KHUNTO, no auzénsia hosi Prezidente Parlamentu Nasionál tanba hala’o viajen ba rai-liur iha misaun serbisu seluk.
Nia dehan, seidauk mark ajenda fiksu ba ajenda eleisaun kandidatu komisáriu CAC iha plenária, no bainhira xefe bankada sira inklui Prezidente PN rasik prezente ona mak sei tau ajenda hodi halo ona votasaun ba eleisaun komisáriu CAC ne’e rasik.
‘’Seidauk bele tau ba ajenda no ajenda ne’e sei muda bainhira Deputadu sira kompletu, Prezidente Parlamentu iha, mak foin bele tau ba ajenda. Nune’e ita bele ba halo votasaun, tanba ita hatene ona katak bainhira nomea ba Komisáriu CAC hakarak ka lakoi tenke ho votu maiória (absoluta),” nia dehan.
Tuir lejislasaun ne’ebé vigora, naran sira-ne’ebé propoin hosi Governu sei analiza no vota hosi PN, no sira-nia designasaun sei presiza maiória absoluta hosi Deputadu ne’ebé marka prezensa, pelumenus ¾ hosi Deputadu ho funsaun efetiva.
Notísia Relevante: Bankada CNRT sei buka konsensu ho opozisaun ba komisáriu CAC
Jornalista : Nelson de Sousa
Editór : Cancio Ximenes
