DILI, 23 fevereiru 2024 ( TATOLI) – Ajénsia Kooperasaun Internasionál Japaun (JICA) observa sistema irrigasaun Bulutu, iha postu administrativu Laleia-Manatuto, ne’ebé reabilita iha outubru 2023, tanba danifika husi dezastre naturál ne’ebé akontese iha 04 abríl 2021.
Objetivu husi vizita ne’e atu avalia oinsá sistema irrigasaun ne’e utiliza ba kuda hare no atividade agríkola sira seluk.
Ofisiál Sénior Programa JICA, Armando Amaral da Cruz, hateten sistema irrigasaun Bulutu ne’e kobre munisípiu rua maka Postu Administrativu Laleia, iha Manatuto, no Vemasse iha Baucau, ne’ebé fornese bee ba natar agrikultór nian hamutuk ektare 780.
Armando da Cruz salienta kata JICA reabilita irrigasaun Bulutu ne’e atu garante efetividade prosesu produsaun hare iha fatin refere.
Koordenadór Tékniku Agrikultura, Amaro Martinho Ximenes, esplika katak irrigasaun Bulutu daudaun ne’e la’o di’ak no ajuda ona hodi garante bee ba grupu agrikultór hamutuk 16 nian natar.
“Husi sistema irrigasaun ne’e ajuda ona agrikultór sira bele kuda hare dala-rua iha tinan ida. Tinan ne’e, agrikultór sira bele konserva setór potensial husi natar ne’ebé ho luan kuaze ektare 574”, dehan.
Agrikultór Raimundo de Sousa hatete reabilitasaun irrigasaun Bulotu ne’ebé JICA halo ne’e tanba ajuda tebes sira tanba fornese bee ba natar no liuhusi atividade kuda hare ne’e nia rezultadu bele fó lukru ba família kada tinan.
“Ami kontente tanba tinan hitu ami hetan distribuisaun bee di’ak, ne’e duni bele ajuda ona agrikultór sira”, realsa.
Raimundo de Sousa iha natar ektare lima no husi rezultadu produsaun hare ne’e sira nia konsege hetan foos kuaze tonelada neen kada tinan.
“Iha 2023, ha’u fa’an ona foos me’ebé ha’u prodús ne’e ba ACELDA no ha’u hetan kuaze rihun $2′, nia informa.
Iha tinan kotuk, irrigasaun Bulut apoia produsaun hare grupu agrikultór 16 ho tonelada 2.200.
Rekorde katak, irrigasaun Bulutu hetan inaugurasaun iha18 janeiru 2017. Projetu ne’e hetan apoiu husi Asisténsia Dezenvolvimentu Ofísial Japaun nian liuhusi JICA. Konstrusaun ba irigasaun ne’e komesa iha outubru 2014 no finaliza janeiru 2017.
Governu nipóniku disponibiliza orsamentu aproximadamente millaun $13 no Timor-Leste kontribui millaun $1,7 ba projetu konstrusaun irrigasaun refere.
Notísia relevante: Tinan oin MAP planu reabilita irrigasaun 40
Jornalista: Tomé Amado
Editora: Maria Auxiliadora
