OÉ-CUSSE, 23 fevereiru 2024 (TATOLI) – Autoridade Rejiaun Administrativa Espesiál Oé-Cusse Ambeni (RAEOA), lideradu Rogério Tiago Lobato, nomea Remígio Nuno Sila, nu’udar Diretór Obra Públika hodi lidera Diresaun Rejionál Infraestrutura, hodi troka Diretór Sesante Candido dos Reis Amarál.
Notísia relevante: Rogério Lobato nomea Amaro Efi lidera Agrikultura Oé-Cusse
Nota imprensa ne’ebé Agência Tatoli, asesu, Xefe Gabinete Sekretária Rejionál Asuntu Finansa, Constancio Suni, sesta ne’e hahú aprezenta Diretór foun ne’e ba departamentu tolu ne’ebé tutela ba Diresaun Rejionál Infraestrutura (DRI).
Departamentu tolu ne’e maka hanesan Departamentu Eletrisidade Timor-Leste (EDTL), Departamentu Servisu Água Saneamentu (DSAS) no Departamentu Rejionál Transporte Terrestre (DRTT).
“Tuir planu Diretór foun Obra Públika ne’e sei hahú servisu iha semana oin, tanba sei halo planu ba entrega hosi diretór sesante ba diretór foun,” sita iha komunikadu ne’e.
Relasaun ho asuntu ne’e, Diretór Diresaun Rejionál Infraestrutura (DRI) Sesante, Candido dos Reis Amaral, rekoñese, no simu ona vizita ofisiál hosi Gabinete Sekretária Finansa, maibé seidauk iha karta ofisiál ruma kona-bá ezonerasaun.
“Sim, ohin sira mai tiha ona, aprezenta iha-ne’e, maibé ha’u seidauk simu no haree karta ne’e atu ezonera ha’u, mai aprezenta de’it, dehan nia mak diretór atu troka ha’u hanesan ne’e de’it,” Candido dos Reis Amarál, ba Agência Tatoli, iha Oé-Cusse, sesta ne’e.
Notísia relevante:RAEOA aloka millaun $1-resin instala liña eletrisidade iha sub-rejiaun haat
Entretantu, Diretór sesante Candido dos Reis Amaral, lidera Diresaun Rejionál Infraestrutura, hahú kedas iha tinan 2015 to’o ohin loron, kona-bá Diretór foun Remígio Nuno Sila, antes ne’e hala’o servisu nu’udar enjeñeiru iha Progarama Nasionál Dezenvolvimentu Suku (PNDS) Oé-Cusse.
Jornalista: Abílio Elo Nini
Editór: Evaristo Soares Martins
