Reprezentante povu kontinua husu fó tratamentu dignu ba veteranu sira
DILI, 23 fevereiru 2024 (TATOLI)—Reprezetante povu iha Parlamentu Nasionál (PN) liuhosi Deputada CNRT, Bendita Moniz Magno, kontinua husu Estadu fó tratamentu dignu ba veteranu sira.
“Loron 03 marsu ne’e, loron Nasionál ba veteranu nian. Ita fiar katak veteranu sira mós halo tratamentu dignu,” Deputada Bendita hateten ba jornalista sira iha Parlamentu Nasionál, sesta ne’e, relasiona ho komemorasaun loron Nasionál Veteranu ne’ebé sei komemora iha kada 03 marsu, sesta ne’e.
Tanba ne’e, nia husu Ministéiriu asuntu Kombatente Libertasaun Nasionál (MAKLN) atu aselera validasaun veteranu rejistadu iha tinan 2009, hodi bele hetan pensaun hosi Estadu.
“Balun ne’ebé seidauk rejistu, ita hatene katak agora daudaun hosi Kombatente Libertasaun Nasionál ba ona halo verfikasaun dadus atu haree kona-ba veteranu sira-ne’ebé rejista iha 2009,” nia hateten.
Antes ne’e, Membru Parlamentu Nasionál (PN) liuhosi Deputadu Fretilin, Antonino Doutel Sarmento no Deputada CNRT, Aliança da Conceição, husu Ministériu asuntu Kombatente Libertasaun Nasionál (MAKLN) atu aselera prosesu validasaun naran veteranu no kombatente rejistadu iha tinan 2009.
Deputadu FRETILIN, Antonino Doutel Sarmento, hateten asuntu sira kombatente ninian ne’e ema sira-ne’ebé fó vida ba luta naruk ida hodi define tiha indepedénsia país ne’e ho sira-nia sakrefísiu barak mate ona no balun sei moris.
“Tanba ne’e mak iha verifikasaun dadus ba kombatente sira-ne’ebé mak rejistu iha segundu faze tinan 2009 ninian ne’e, iha dezde Governu anteriór esforsu makaas hodi hakarak konklui ona dadus rejistu nian, oinsá ita-nia kombatente sira iha ona espasu sira-nia direitu. Tanba, Governu anteriór la konsege verifika to’o ramata mak ida-ne’e mai fali IX Governu. Ita dejezu katak hakaas aan ba kombatente sira-ne’ebé verifikadu hotu ona, hein oinsá mak sira válida hodi oinsá kombatente sira merese iha direitu ne’ebé Estadu konsidera ona,” nia hateten.
Membru órgaun lejislativu ne’e hateten, tanba asuntu kombatente ne’e kuaze ema sira iha baze ne’e ezije makaas no balun ho idade ona no balun ho kondisaun moras, entaun presiza MAKLN aselera prosesu validasaun hodi valida ona hodi sira iha direitu ba pensaun ne’ebé mak Estadu fó.
Deputada CNRT, Aliança da Conceição, mós husu MAKLN presiza aselera prosesu validasaun tanba kombatente sira balun idade ona, balun moras ne’ebé hanoin presiza aselera valida hodi sira bele hetan ona sira-nia direitu.
Loron nasionál veteranu ne’ebé selebra kada tinan iha loron 03 marsu ne’e, foti hosi loron istóriku 03 marsu 1981, ne’ebé konsagra ona hosi estadu Timor -Leste liuhosi Lei no 3/ 2016 nu’udar loron Veteranu sira nian.
Iha loron istóriku ne’e, 03 marsu 1981 ne’e, FRETILIN hala’o konferensia nasionál iha Maubai Viqueque, ho orientasaun hosi membru Comite Central FRETILIN [CCF] sobre vivente na’in-rua, Xanana Gusmao ho Mau-hunu Builerek. konfrensista sira hili [CCF] na’in sia (9) foun tan mak foti dezisaun importante lubuk ida, hodi organiza ou reorganiza Timor-leste nia luta ba Libertasaun Nasionál iha territóriu tomak.
Loron nasionál veteranu nian ne’e, komemorea dahuluk iha tinan 2017, iha Antigu Prezidente no Antigu Primeiru-Ministru, Taur Mata Ruak, nia ukun.
Notísia Relevante: CCLN relata preparasaun selebra loron nasionál no kriasaun fundu veteranu ba PM
Jornalista : Nelson de Sousa
Editór : Cancio Ximenes
