DILI, 22 fevereiru 2024 (TATOLI)–Primeiru-Ministru (PM), Kay Rala Xanana Gusmão, hala’o enkontru ho Prezidente Konsellu Kombatente Libertasaun Nasionál (CCLN, sigla portugés), Vidal de Jesus ‘Riak Leman’, Vise-Preziente CCLN, Marito Reis no Vise-Prezidente Brigadeiru Jenerál, João Miranda ‘Aluk Descartes’, hamutuk ho ekipa.
Enkontru ne’e hodi atualiza preparasaun selebra loron nasionál veteranu iha loron 03 marsu 2024 inklui asuntu kriasaun fundu no harii banku veteranu nian.
“Ami husu para maun boot (Xanana) atu ba loke hela ami-nia loron nasionál veteranu nian hodi hato’o mensajen ba veteranu munsípiu 13 ne’e hotu inklui Rejiaun Administratiba Espesiál Oé-cusse-Ambeno (RAEOA) no asuntu seluk mak kona-ba kriasaun fundu ba veteranu sira nian,” Riak Leman relata hafoin enkontru ho PM Xanana, iha Palásiu Governu, kinta ne’e.
Notísia relevante : CMCLN Oé-Cusse ajenda atividade haat komemora loron veteranu
Tema ba selebrasaun loron veteranu ‘Hamutuk La’o Ba Oin’ ho sentidu atu bolu entidade hotu, liu-liu veteranu nu’udar rin Estadu atu kontribui no partisipa nafatin iha prosesu harii dame no harii Estadu.
Xefe Ezekutivu apresia no prontu nafatin atu servisu hamutuk hodi haree bem-estar veteranu no kombatente.
Aleinde ne’e, CCLN fó fiar ba Xefe Governu nune’e bele fó ona solusaun di’ak ba kriasaun fundu ba veteranu.
“Ami espera iha tinan 2024 nia laran, hakarak ka lakohi banku ne’e atu harii. Fundu veteranu nian to’o ohin loron hamutuk millaun $41,” nia akresenta.
Ligadu ho ne’e, CCLN rasik koordena no hasoru malu ona ho Governadór Banku Sentrál Timor-Leste (BCTL, sigla portugés), Helder Lopes, hodi ko’alia kona-ba preparasaun rekursu umanu harii banku veterenu inklui kritéria legál sira atu harii Banku Veteranu kompleta ho estatutu no mata-dalan ba lei sira hotu.
Ajenda preparasaun selebrasaun loron nasionál veteranus hahú iha loron 01 marsu sei selebra misa nasionál ba eroi sira hotu depois lori ai-funan no lilin ba presta omenajen iha semitériu Jardin Eroi nasionál Metinaro inklui mós munísipiu hotu.
CCLN konvida mós bainaka veteranu hosi nasaun viziñu Austrália no rai seluk hodi vizita muzeu reziseténsia ne’ebé prezerva dokumentu no materiál funu inklui istória luta Timor-Leste.
Iha loron 02 marsu sei selebra semináriu nasionál ne’ebé sei halibur oradór importante sira hodi ko’alia kona-ba istória luta FALINTIL ho povu no loron 03 marsu maka foin selebra serimónia nasionál isar bandeira nasionál hamutuk ho Komandu FALINTIL-Forsa Defeza Timor-Leste no realiza marsa ba dame hosi Palásiu Governu iha Sentru Konvensaun Dili Dili (CCD, sigla portugés).
Jornalista : Antónia Gusmão
Editora : Julia Chatarina
