DILI, 26 fevereiru 2024 (TATOLI)—Deputada Partidu Demokrátiku (PD) iha Parlamentu Nasionál (PN), Rozenha Martins, husu Governu liuhusi ministériu relevante atu halo atendimentu ba kazu HIV-SIDA iha rai-laran ho sériu.
Notísia Relevante: TL rejista atualmente afetadu HIV-SIDA hamutuk 1849
Nia preokupa ho kazu HIV-SIDA ne’ebé estraga joven, hanesan dadus ikus hetan hosi Institutu Nasionál Kombate HIV-SIDA iha setembru tinan 2023 hatudu katak timoroan hamutuk ema 2050 mak afeta ba moras ida-ne’e..
Ho vítima hirak ne’e, liuliu idade ne’ebé afeta barak ne’e kuaze idade 25-44 ne’e hamutuk 1205 no idade hosi 15 to’o 24 ne’e hamutuk 572, ne’ebé kompostu hosi mane hamutuk 1357 no feto hamutuk 645, no hosi dadus ne’e mós hatudu katak pasiente 1600 agora sei halo hela tratamentu no kuaze 300 mak mate ona.
‘’Ida-ne’e kazu sériu, presiza atendimentu sériu hosi Governu liuyliu ministériu relevante atu kombate virus aat ida-ne’e, hodi labele oho beibeik ita-nia joven nia future. Tanba, nasaun nia destinu depende ba investimentu joven iha futuru. Tanba ne’e, sujere ba Governu atu primeiru sensibiliza informasaun kona-ba impaktu moras HIV-SIDA ba ema hotu iha territóriu laran tomak, espesialmente ba joven sira-ne’ebé kona perígu joven hosi sexu livre,” nia levanta liuhosi reuniaun plenária PN, segunda ne’e.
Deputada hosi bankada Governu ne’e sujere mós ba Ministériu Edukasaun atu fó mós sensibilizasaun intensiva kona-ba edukasaun seksuál no matéria HIV-SIDA ba iha eskola sai matéria jerál ba estudante sira hodi bele iha koñesimentu kona-ba moras ne’e, tanba perígu tebes ba sira-nia futuru.
Nia husu ministériu kompetente atu regula lei hodi taka tiha sítiu pornográfia ne’ebé estudante sira mós asesu livre liuhosi internet.
Jornalista : Nelson de Sousa
Editór : Cancio Ximenes
