iklan

NASIONÁL, HEADLINE, KAPITÁL

PM Xanana organiza abitante hamoos valeta iha área Taibesi

PM Xanana organiza abitante hamoos valeta iha área Taibesi

Primeiru-Ministru, Kay Rala Xanana Gusmão, hamutuk ho ekipa no komunidade halo limpeza jerál iha área Taibesi, domingu (25/02). Imajen/Mídia GPM

DILI, 26 fevereiru 2024 (TATOLI)—Primeiru-Ministru (PM), Kay Rala Xanana Gusmão, hamutuk ho ekipa Bombeiru no Korpu Seguransa Pesoál (CSP), Saneamanetu munisípiu Dili no komunidade, ho voluntáriu halo limpeza jerál hodi hasai masa, bee-hemu mamuk, plástiku, no modo-tahan ne’ebé pesoál balun soe arbiru.

Inisiativa ne’e tanba durante akontese udan kuaze oras ida liu, halo valeta bee dalan hosi Merkadu Taibesi tun to’o área rotunda estrada Hali-laran Taibesi Dili intupidu nakonu ho foer, ne’ebé bee lori hosi merkadu laran tun to’o estrada laran.

“Ha’u husu ba imi hotu iha fatin ne’e (Merkadu Taibesi), mai ita hotu halo limpeza tanba foer nakonu iha imi-nia valeta, uma oin no uma kotuk, se ita la hamos foer ne’e sei nakonu iha valeta laran, kria susuk moris lori moras dengue tanba susuk moris hosi foer no bee nalihun hanesan ne’e, mai ita halo limpeza iha ida-idak ninia uma oin to’o estrada atu hasai foer sira ne’e,” PM Xanana fó hanoin ba komunidade iha domingu (25/02).

Notísia relevante : SEATOU sobu barraka negosiante iha Ai-mutin no muda bá Merkadu Manleuana

Impaktu hosi foer ne’ebé soe arbiru halo valeta bee dalan iha areadór Merkadu Taibesi tun to’o área rotunda intupidu, halo bee no foer nakonu iha valeta no estrada laran.

Nune’e, Xefe Governu halo kedas avizu ba komunidade hotu, ho kontente maski udan, sai hosi uma hahú hosi ema boot, joven feto no mane, ferik no katuas  to’o labarik tama valeta laran no uma ninin hodi hamos, raut no suru sai foer sira.

PM alerta mós ba komunidade Dili laran inklui munisípiu hotu atu idak-idak halo limpeza iha uma hodi evita susuk no foer ne’ebé bele lori kauza moras oin-oin, tanba rai udan kontinua akontese, tanba mudansa klimátika akontese iha fatin hotu.

Hafoin fó sai avizu ne’e, komunidade organiza-an sai hosi uma hodi halo limpeza iha sira-nia uma oin hasai foer iha valata laran ho apoiu hosi ekipa Bombeiru, ekipa Saneamentu munisípiu Dili, inklui empreza Montanha Diak, ne’ebé oferese karreta loader suru sai  foer hodi tula sai foer hirak ne’e ba soe iha lixeiru Tibar.

Ekipa Bombeiru hamutuk ho Xefe Governu kontinua taka hikas valeta hirak ne’ebé sobu no husu atensaun ba negosiante hotu iha Merkadu Taibesi atu labele soe foer arbiru iha estrada no valeta laran.

Entretantu, hafoin limpeza, Xafe Governu hamutuk ho Bombeiru lori bee fase no fó haris labarik hirak ne’ebé isin lolon nakonu ho tahu no sosa sapatu foun fahe ba labarik sira ne’ebé hatudu badinas inklui fahe bebida fresku, nu’udar aktu agradesementu ba apoiu iha serbisu voluntáriu ne’ebé nakonu ho espresaun kontente no domin.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!