DILI, 27 fevereiru 2024 (TATOLI)—Komisaun Nasionál Eleisaun (CNE, sigla portugés), tersa ne’e, realiza workshop ho tema ‘Elaborasaun matéria edukasaun sívika ho nia mekanizmu’, durante loron-tolu, hahú loron 27 to’o 29 fevereiru 2024.
“Atividade ne’e nu’udar faze preparativu inisiál CNE ba Eleisaun Asembleia Munisipál, ne’ebé sei realiza iha tinan 2025 no 2026,” Prezidente CNE, José Agostinho da Costa Belo, hateten, iha salaun Laline-Larigutu, Colmera.
Elaborasaun matéria edukasaun sívika importante tanba tuir konstituisaun, CNE iha papél importante hodi fó esklaresimentu ba públiku, enkuantu Sekretariadu Tékniku Administrasaun Eleitorál (STAE) iha kompeténsia fó edukasaun votante.
“Edukasaun sívika importante tanba hanesan asuntu ne’ebé dinámiku, tanba ne’e importante mak ita-nia komunidade bele kompreende didi’ak eleisaun ne’e,” nia akresenta.
Notísia relevante : CNE tinan ne’e hakarak estabelese sistema biométriku
Molok to’o iha eleisaun munisipál sira, esforsu ne’ebé CNE halo mak tenke halo preparasaun di’ak liuhosi metéria edukasaun sívika hodi halo esklaresimentu ba sosiedade sivíl, partidu polítiku, eleitór no seluk tan, oinsá aprezenta kandidatu di’ak no benefísiu hili membru asembleia munisípiu.
“Entaun, ita presiza elebora modelu edukasaun sívika ne’ebé bele transmite liafuan hodi konvese sira atubele partisipa ho di’ak no konvensidu. Nune’e, elaborasaun matéria ba eleisaun prezidensiál, parlamentár no suku, ita dezenvolve fali oinsá foku liu bá eleisaun munisipál ninian, nune’e populasaun bele akompaña didi’ak,” Prezidente CNE tenik.
Iha fatin hanesan, Diretór Jerál CNE, Deolindo Deo Ramos, informa, workshop ne’e partisipa hosi Diretór CNE munisípiu inklui xefe departamentu sira.
“Durante loron-tolu ita sei elebora matéria edukasaun sívika ba preparasaun eleisaun suku 10, ne’ebé atu realiza iha abril 2024 no eleisaun munisipál hotu ne’ebé sei akontese tinan oin mai tan, entaun ita elabora uluk matéria relevante ho ita-nia situasaun tanba kada tinan no eleisaun diferente,” nia salienta.
Razaun CNE halo elaborasaun matéria edukasaun sívika tanba tempu ona hodi muda matéria ho mekanizmu sira.
“Ita hotu iha ne’e hanesan na’in ba matéria ne’e no ita elabora matéria edukasaun sívika ne’e atu aumenta koñesementu di’ak liután, entaun durante loron-tolu ne’e ita sei halo elaborasaun hamutuk ba matéria ho nia mekanizmu sira. Ita espera durante loron hirak ne’e bele halo elaborasaun di’ak tanba hosi inisiativa ne’e, ita sei haree no identifika alvu, mekaizmu, no resepsaun sira ne’ebé pertinente ba tinan 2024.
Jornalista : Arminda Fonseca
Editora : Julia Chatarina
