OÉ-CUSSE, 27 fevereiru 2024 (TATOLI) – Tribunál Distritál Oé-Cusse (TDO), rejista kazu 400-resin komposta hosi kazu krime no kazu sivíl seidauk hetan julgamentu hahú hosi 2022 to’o fevereiru 2024 ne’e tanba juis la sufisiente.
Juis Administradór Tribunál Distritál Oé-Cusse (TDO), Argentino Luísa Nunes, esplika, kondisaun ne’e akontese tanba númeru juis la sufisiente hodi kontribui númeru kazu pendente komposta hosi kazu krime 300-resin no kazu sivíl 100-resin.
Notísia relevante: Molok jere tribunál Oé-Cusse, Juiz Argentino rona uluk opiniaun hosi entidade
Juis Administradór TDO, Argentino Luísa Nunes, informa, iha ámbitu vizita ofisiál hosi Grupu Traballu bá Reforma Justisa, liderada Lúcia Lobato, iha tribunál Oé-Cusse, segunda ne’e.
“Iha-ne’e maizumenus kazu 300-resin, no kazu sivíl 100-resin, ida-ne’e tuir relatóriu tinan kotuk to’o 2024 nian, ne’e tanba ami (juis) na’in-tolu de’it, ida agora ba tuir formasaun iha Portugál, sei iha juis na’in-haat tán,” Argentino Nunes, ko’alia iha Tribunál Oé-Cusse.
“Iha-ne’e juis na’in-tolu, agora ida ba tuir formasaun iha Portugál, entaun prosesu la’o ne’e, imi haree, kada fulan ami empresta juis ida hosi Dili mai iha-ne’e loron lima, hodi julga, entaun prosesu koletivu ne’e la’o neineik tanba númeru juis menus, maibé singulár laiha problema,” nia katak.
Nia dehan, hakarak prosesu ne’e la’o lais, kazu sira labele iha tempu naruk, numéru juis tenke aumenta, nune’e bele responde ona ejizénsia publiku kona-bá kazu ne’ebé pendente kleur.
“Ha’u tinan kotuk foin mai Oé-Cusse, ha’u hakarak kazu sira-ne’e tún, maibé kontráriu tanba foin to’o mai kolega juis ida ba tuir formasaun, entaun númeru kazu aumenta no balu pendente, sei mumentu ami-na’in tolu, to’o dezembru 2023 kazu sira-ne’e hotu ona,” nia katak.
Notísia relevante: Lúcia Lobato rekolla preokupasaun Autoridade Judisiáriu Oé-Cusse hodi aprezenta bá Primeiru Ministru
Maske nune’e, Juis Administradór ne’e, promete, iha 2024 ne’e, sei finaliza kazu pendente sira iha Tribunál Oé-Cusse, tanba iha fulan-marsu ne’e, sei iha kolokasaun juis ba iha Oé-Cusse.
“Entaun prosesu kazu 300-resin ne’e bele hotu iha dezembru 2024, tanba marsu agora, kolega juis ne’e remata ona nia formasaun, sei mai haforsa tán servisu tribunál Oé-Cusse,” nia garante.
Jornalista: Abílio Elo Nini
Editór: Evaristo Soares Martins
