OÉ-CUSSE, 13 jullu 2023 (TATOLI) – Juiz Argentino Luiza Nunes, hala’o enkontru ofisiál ho entidade sira iha Rejiaun Administrativa Espesiál Oé-Cusse Ambeno (RAEOA) molok jere funsionamentu Tribunál Distritál Oé-Cusse.
Notísia relevante: Tribunál Oé-Cusse fó paresér ba SAMHEE halo manutensaun ekipamentu pezadu
Juiz Administradór Primeira Instánsia, Argentino Luiza Nunes, informa, durante semana ida parte tribunál hakbesik ba entidade sira hanesan, Ministériu Públiku (MP), Defensoria Públiku, Polísia Nasionál Timor-Leste (PNTL), Konsellu Veteranu no komunidade sira atu rona opiniaun no rekomendasaun kona-bá servisu tribunál nian iha Oé-Cusse Ambeno.
“Enkontru ne’e realiza ona dezde semana kotuk entidade sira seluk, ohin mai iha Konsellu Veteranu no sei kontinua ba ho sira seluk-tán no komunidade, tanba ha’u foin mai iha ne’e, entaun antes ha’u hahú kna’ar, ha’u tenke rona instituisaun sira, liga ho servisu tribunál nian, atu rona sira-nia opiniaun observasaun durante funsionamentu tribunál iha Oé-Cusse,” Juiz Argentino Luiza Nunes, ba jornalista sira hafoin remata enkontru ho Konsellu Veteranu Oé-Cusse, kuarta ne’e.
Nia afirma, objetivu hosi enkontru hirak-ne’e, atu mai hakbesik ba entidade sira hotu iha Oé-Cusse atu rona sira-nia opiniaun, kona-bá servisu tribunál, hodi halo melloramentu ba funsionamentu tribunál nian, hodi fó atendimentu justisa ba povu ho loloos.
Nune’e presiza rona, bele iha koñesimemntu, falla iha ne’ebé, ida-ne’ebé mak presiza atu halo, tanba tribunál la’os Maromak buat hotu-hotu nia halo, maibé presiza rona komunidade nia preokupasaun iha parte ne’ebé hodi jere ho loloos.
“La’os juiz administradór mai fali atu ko’alia kazu ruma, maibé ne’e la’e, ha’u mai atu rona sira-nia hanoin oinsa mak tribunál la’o di’ak ba ema hotu, tanba ha’u husik hela família mai atu servisu nasaun, tan ne’e iha ha’u mandatu hakarak halo netik buat ruma ba povu Oé-Cusse antes ba fatin seluk, entaun tenke servisu hamutuk ho entidade hotu, tanba hamutuk mak ita-bele,” nia afirma.
Tuir nia, tribunál tenke garantia imparsialidade bazea lei ne’ebé iha, tenke garantia nia funsionamentu tuir saida mak hatuur ona iha justisa Timor-Leste, maibé konfiánsa iha povu hodi hakat ba oin, tuir buat hotu ne’ebé konsagra ona iha Konstituisaun RDTL no regras sira-ne’ebé maka estabelese ona.
“Ha’u iha mehi boot hakarak Oé-Cusse sai modelu iha Timor-Leste, tanba ha’u-nia mandatu iha Oé-Cusse tinan tolu, bele renova no bele lato’o maibé importante tenke sai modelu ba fatin hotu-hotu,” nia promete.
Iha ámbitu enkontru ne’e, Prezidente Konsellu Veteranu Oé-Cusse, Venancio Lafo, sujere atu aselera kazu sira-ne’ebé pendente kuaze tinan rua to’o tolu seidauk prosesa.
“Ohin ami ko’alia oinsa apoia kona-bá servisu tribunál nian la’o oinsa, tanba foin mai hala’o servisu iha Oé-Cusse, ne’ebé ohin konsellu veteranu fó nia sujestaun, maske ami lamete ba servisu tribunál maibé, hanesan komunidade ita-nia haree lala’ok ne’e presiza aselera hanesan kazu sira pendente, ema barak iha kazu,” nia sujere.
Notísia relevante: FOTO ATUÁL: PTR fó pose ba Juís Administradór Tribunál Judisiál Primeira Instánsia
Jornalista: Abílio Elo Nini
Editor: Evaristo Soares Martins
