RAEOA propoin MJ aumenta kuota pasaporte husi 14 ba 50 kada semana
OEKUSI, 27 Outubru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), tersa ohin, hala’o reuniaun extraordináriu ho Diretór 21 ho Sekretáriu Rejionál tolu, no konsege aprova deliberasaun aseitasaun membru Autoridade RAEOA, hodi propoin ba Ministériu Justisa (MJ) atu aumenta kuota pasaporte husi 14 ba 50 kada semana no kada fulan 200 inklui reativa pasa-fronteira sira.
Proposta deliberasaun ne’e, propoin husi Diretór Servisu Rejistu Sívil Notariadu Oekusi, Júlio Coel, perante reuniaun extraordináriu membru Autoridade RAEOA, iha salaun konvensaun Palaban, ohin.
“Asuntu ne’e ha’u koloka iha reuniaun ohin, tanba Oekusi hanesan enklave ida, diferente ho munisípiu seluk, asesu atu ba Dili no ba nasaun viziñu presiza tebes pasaporte no fronteira iha Oekusi hale’u, entaun pasa-fronteira mós presiza tebes,” nia hateten.
Notísia relevante:Autoridade Lokál: Governu presiza aumenta kuota pasaporte iha Oekusi
Diretór ne’e informa, kuota ba kadernu pasaporte durante ne’e, fulan ida Oekusi hetan dala haat, kada semana iha de’it 14, tan bainhira atu hetan pasaporte balun tenke ba hein kedas iha edifiísiu notariadu iha oras tuku 2:00 kalan, atu hein kedas, tanba to’o dadersan ema barak nakonu ona iha formatura.
Dirijente ne’e afirma, husi pasaporte 14 ne’e, iha mós pedidu urjente husi instituisaun Estadu sira, dalaruma simu de’it sanolu (10) no prioridade ba instituisaun Estadu sira bainhira viajen Estadu ba estranjeiru.
“Ami simu ona reklamasaun barak husi públiku, no ha’u mós koordena ona ho nasionál maibé kompeténsia iha Ministériu Justisa, tanba ne’e iha reuniaun ne’e, liuhusi aprovasaun deliberasaun ne’e,bele hato’o hela pedidu ida ba Ministru Justisa, atu bele konsidera hodi aumenta kouta,” nia hateten.
Notísia relevante:Notariadu Oekusi arrekada reseita rihun $46-resin husi trata pasaporte
Iha biban ne’e, Prezidente Autoridade RAEOA, Régio da Cruz Salu, konsidera aumenta kuota pasaporte no reativa pasa-fronteira importante, tanba Oekusi diferente ho munisípiu seluk.
“Deliberasaun ne’e aprovadu ho pontu rua, primeiru, delibera aseitasaun membru Autoridade RAEOA, atu aumenta kouta pasaporte husi 14 ba 50 no kada fulan 200 inklui reativa pasa-fronteira, segundu delibera aseitasaun membru Autoridade RAEOA atu autoriza Prezidente Autoridade RAEOA hato’o pedidu formál ba Ministru Justisa,” nia afirma.
Jornalista: Abílio Elo Nini
Editór: Rafael Ximenes de A. Belo
