Autoridade Lokál: Governu presiza aumenta kuota pasaporte iha Oekusi
OEKUSI, 14 Agostu 2026 (TATOLI) – Xefe Suku Costa, iha sub-rejiaun Pante Makasar, Francisco Colo, rekomenda ba Governu Sentrál, liuhusi Ministériu Justisa (MJ), atu aumenta kuotasaun ba tratamentu kaderneta pasaporte iha Diresaun Rejionál Servisu Rejistu Sívil Notariadu Rejiaun Administrativa Espesiál Oekusi Ambenu (RAEOA).
Rekomendasaun ne’e hato’o tanba komunidade barak tenke hein husi dadeer-saan nakukun iha edifísiu Notariadu Oekusi nian hodi bele trata pasaporte.
“Governu tenke hadi’a, tanba tuir ha’u nia obsevasaun, iha tempu kalan, oras tuku 01:00 madrugada, ha’u haree komunidade sira balun mai ona iha edifísiu notariadu. Ha’u hanesan xefe suku husu, imi mai halo saida iha kalan hanesan ne’e, sira dehan, mai prepara atu aban halo pasaporte,” Xefe Suku Costa Francisco Colo dehan, iha edifisíu notariadu Oekusi, ohin.
Nia haktuir, hafoin haree tiha situasaun ne’e, nia ba konfirma ho funsionáriu Notariadu nian no simu informasaun katak limitasaun kuota mak fó impaktu ba atendimentu.
“Ha’u hanesan xefe suku, tenke buka. Ha’u rasik ba konfirma ho serbisu na’in-sira iha notariadu, maibé responde katak, kada semana fó de’it ema 10-resin,” nia afirma.
Tanba ne’e, autoridade lokál ne’e rekomenda ba Governu Sentrál liuhusi Ministériu Justisa atu fahe no aumenta kuota to’o ema 50 kada semana, atu nune’e labele hamosu susar ba populasaun no iha tempu hanesan bele aumenta reseita ba kofre Estadu.
“Labele fó de’it na’in-14, bele liu, kada semana na’in-50 hanesan ne’e, tanba rendimentu kan ba Estadu, duke serbisu balun fó atendimentu gratuita, exemplu kartaun Billete Identidade, sertidaun moris, ne’e sei gratuita hela no fó atendimentu kada loron ba ema barak, maibé serbisu ne’ebé atu kontribui ba kofre Estadu, iha limitasaun fali, ne’ebé ita husu Governu presiza hadi’a buat sira-ne’e,” nia hateten.
Notísia relevante:Kaderneta pasaporte rihun-60 to’o ona Timor-Leste
Hatan ba rekomendasaun ne’e, Diretór Diresaun Rejionál Servisu Rejistu Sívil Notariadu Oekusi, Júlio Coel, rekoñese atendimentu pasaporte iha Oekusi hamosu preokupasaun husi públiku tanba limitasaun. Maibé, nia haktuir katak sira ezekuta de’it desizaun husi nasionál.
“Koutasaun ne’e mai husi Diresaun Jerál Rejístu Notariadu, Ministériu Justisa mak atribui mai ita, kada fulan dala haat, maibé kada semana fó de’it ba ema na’in-14. Ami labele halo liu tanba kuota ne’e fó kedan husi nasionál. Ami mós sente, preokupasaun públiku, dalaruma balu hato’o reklamasaun direita, maibé desizaun husi nasionál, ami ezekuta de’it,” nia hateten.
Notísia relevante:MJ konklui ona prosesu akizisaun ba kaderneta pasaporte rihun 75
Jornalista: Abílio Elo Nini
Editór: Rafael Ximenes de A. Belo
