RAEOA aprova deliberasaun pagamentu ba projetu ‘não financeira’ 15 ho fundu FED

OEKUSI, 27 Outubru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), hala’o reuniaun extraordináriu ho Diretór 21 ho Sekretáriu Rejionál tolu, hodi aprova deliberasaun ida atu halo pagamentu projetu ‘não financeira’ hamutuk 15, ne’ebé implementa dezde 2025, hodi selu ona iha tinan ne’e, ho nia verba mai Fundu Espesiál Devenvolvimentu (FED) ho montante millaun $1-resin.

Proposta ba deliberasaun ne’e propoin husi Diretór Servisu Rejionál Obra Públika Oekusi, Remígio Nuno Sila, katak projetu la’ós finanseiru 15 ne’e implementadu iha 2025, liuhusi prosesu konkursu públiku, kompleta ona ho termu kontratu, no enkamiña ona iha Ajénsia Dezenvolvimentu Nasionál (ADN), maibé iha tetu Orsamentu Jerál Estadu (OJE) 2026, la integra iha livru OJE 2026 nian.

“Projetu kategória não financeira ne’e iha 15, projetu sira-ne’e implementadu iha 2025 to’o ohin nia progresu fíziku 100%, halo ona inspesaun no fiskalizasaun ne’ebé finalizadu ona, entaun  tenke fó importánsia atu halo pagamentu, tanba montante selu ba projetu sira-ne’e millaun $1-resin,” nia hateten perante reuniaun membru Autoridade RAEOA, iha salaun Alfándega Palaban, ohin.

Notísia relevante:MOP sei avalia lista projetu emerjénsia iha Oekusi

Autoridade infraestrutura ne’e afirma, projetu sira-ne’e tama iha kategória Fundu Kapitál Dezenvolvimentu (FED), no dadaun ne’e iha ona pedidu atu selu millaun $12 no balansu lubun seidauk gasta, tan ne’e espera ho orsamentu ne’e bele finansia projetu 15 ne’e, antes tama OJE 2027 nian.

“Hein katak ho deliberasaun ne’e, bele tulun ita-nia kompañia sira hetan sira-nia direitu, tanba kumpre ona regra prosedimentu no rekomendasaun sira to’o faze finalizasaun obra, entaun presiza konsidera,” nia énfaze.

Notísia relevante:Autoridade RAEOA hatuur fatuk-inan konstrui postu saúde Lamasi iha Nítibe

Prezidente Autoridade RAEOA, Régio da Cruz Salu, konsidera nesesáriu tanba objetivu prinsipál husi aprovasaun deliberasaun ba balansu atu selu projetu la’ós finanseiru sira-ne’e, tanba evita tinan oin labele iha tan tusan (dívida), tanba projetu sira-ne’e tinan rua ona, merese atu prosesu

“Sira-nia kontratu ho osan iha, uluk lansa iha 2025, maibé iha OJE 2026 livru kona-ba lista projetu la inklui projetu sira-ne’e, entaun ita atu selu oinsa antes fin do ano. Ita tenke aprova deliberasaun ida balansu ne’e, depois entrega ba Diresaun Finansa no parte FED hodi aselera prosesu pagamentu,” nia hateten.

Notísia relevante:Autoridade RAEOA hatuur fatuk-inan konstrui sala estensaun tolu iha EBF Manunesi

Entretantu, projetu la’ós finanseiru 15 ne’e maka hanesan, reabilitasaun salaun konvensaun Palaban, postu saúde Kutete no Lamasin, rezidénsia madre Oésilo, perfurasaun bee-moos iha suku Lalisuk, no projetu eskola tolu hanesan Cusi, Maunesi no Aijaofukan, portu Iwao Kitahara Mahata, perfurasaun bee-moos ida iha suku Usitako no projetu balu iha parte agrikultura nian.

Jornalista: Abílio Elo Nini

Editór: Rafael Ximenes de A. Belo