OEKUSI, 25 Fevereiru 2026 (TATOLI) – Ministru Obra Públika (MOP), Samuel Marçal, informa, sei halo avaliasaun ba lista implementasaun projetu emerjénsia sira iha Rejiaun Administrativa Espesiál Oekusi Ambeno (RAEOA), ba de’it sira-ne’ebé prioridade maske simu ona orden serbisu.
“Numeru projetu iha Oekusi balun orden traballu, balun simu tiha ona orden traballu ikus sei la selu tanba kontratu laiha, ou halo tiha kontratu maibé osan laiha, balun fó de’it, ne’ebé husu, alista hotu projetu sira iha Oekusi, ha’u mak sei hetan mandatu husi Primeiru-Ministru atu haree kona-ba fundu, mezmu iha orden serbisu ona, mas ita sei haree, ida-ne’ebé de’it mak ita bele konsidera, no ida-ne’ebé la presiza konsidera,” Governante ne’e dehan iha salaun Álfandega Oekusi, ohin.
Notísia relevante:Rogério Lobato suspende projetu emerjénsia 154 ne’ebé simu ona orden serbisu
Tuir autoridade timoroan ne’e, presiza halo avaliasaun nune’e bele haree prioridade hot-hotu, tanba tenke iha kapasidade atu identifika ida-ne’ebé mak prioridade númeru dahuluk, ida-ne’ebé mak tinan oin bele halo, no ida-ne’ebé mak tinan oin tan mak bele halo fali.
“Se la’e, yang penting hetan osan, ne’e ita hakoi ita-nia nasaun rasik ba rai-ku’ak,” nia konsidera.
Notísia relevante:KAFI Oekusi aprova projetu emerjénsia 26 ho kustu millaun $36-resin
Liga ho asuntu ne’e, Jornalista Ajénsia Tatoli,I.P tenta konfirma ho Diretór Diresaun Rejionál Infraestrutura (DRI) Oekusi, Remigío Nuno Sila, hateten de’it “Ha’u seidauk bele informa buat ida, tanba sira (MOP) mak sei mai avalia direita”.
Entretantu dadus ne’ebé Ajénsia Tatoli,I.P asesu, projetu emerjénsia ne’ebé implementa iha 2024 hamutuk 154, balun rezolve ona balu sei kontinua suspende inklui projetu emerjénsia iha 2025, no iha 2026 ne’e iha projetu emerjénsia rua, mak reabilitasaun estrada Sabén no reabilitasaun estrada husi Naimeko ba Monemeko.
Notísia relevante:Autoridade RAEOA aprova projetu rua ho tipu emerjénsia
Jornalista: Abílio Elo Nini
Editór: Rafael Ximenes de A. Belo
