OEKUSI, 20 Fevereiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), deside aprova projetu rua kategória emerjénsia, atu halo reabilitasaun ba estrada rurál iha aldeia Sabén suku Bobometo sub-rejiaun Oésilo no suku Naimeko liga ba suku Monemeko sub-rejiaun Pante Makasar.
Diretór Diresaun Rejionál Infraestrutura (DRI) Oekusi, Remigío Nuno Sila, informa, Planu Asaun Anuál (PAA) 2026, iha Oekusi sei laiha infraestrutura foun ka projetu foun maibé sei kontinua de’it projetu anteriór sira hamutuk 53 inklui selu dívida sira hamutuk millaun $22 ne’ebé aloka ona iha Orsamentu Jerál Estadu (OJE) 2025.
Maibé tanba nesesáriu ba públiku atu responde ho imediata, Autoridade RAEOA deside hodi aprova urjentementu projetu emerjénsia rua, atu ezekuta iha tempu udan ne’e, mak hanesan, reabilitasaun estrada Sabén iha sub-rejiaun Oésilo no reabilitasaun estrada iha suku Naimeko liga ba suku Monemeko sub-erjiaun Pante Makasar.
“Loloos iha tinan ne’e 2026, laiha projetu foun maibé realidade ita iha rua, emerjénsia teb-tebes, entaun autoridade deside hodi aprova, tanba ida-ne’e kestaun movimentu públiku nian ba estrada, entaun projetu rua ne’e ita fó atensaun maka’as halo intervensaun direita, nune’e labele prejudika movimentu ema no transporte husi nivél suku aldeia bele asesu ba kapitál,” nia hateten iha Oekusi, ohin.
Diretór ne’e hateten, projetu rua ne’e, nia verba sei aloka husi Orsamentu Jerál Estadu (OJE) 2026, ba projetu reabilitasaun estrada Naimeko ba Monemeko ezekuta husi kompañia Hilobadi Unipesoál Lda ho valór kontratu rihun $200-resin.
Kona-ba reabilitasaun estrada iha Sabén, daudaun ne’e kompañia simu ona ordén serbisu, hodi kontinua ba prosesu selebra kontratu, “ne’ebé nia valór ba kontratu seidauk fixa loloos,” nia hateten.
Notísia relevante:Autoridade lokál rekomenda Governu kontinua projetu reabilitasaun estrada rurál iha Nítibe
Remígio Nuno Sila, antes ne’e esplika katak, iha OJE 2026 aloka ba kapitál dezenvolvimentu iha de’it millaun $22, husi verba ne’e, fahe ba kategória tolu, primeiru selu dívida ba projetu anteriór sira-ne’ebé on-going ona no balun finaliza ona, tenke selu iha OJE 2026 ne’e, ho nia valór orsamentu rihun $951,000.00.
Daruak, sei selu projetu 53 kompostu husi projetu iha 2025 hamutuk 29 inklui grande projetu rua –projetu estrada nasionál Tono ba Oésilo no Noefefan ba Oénunu, tanba sei kontinua iha 2026 ne’e, ho nia orsamentu prevee kedas iha OJE 2026 hamutuk millaun $15.
Datoluk, husi projetu 53 ne’e, iha projetu emerjénsia 24, tanba 2025 implementasaun ba projetu hirak-ne’e laiha fundu, maibé tanba ho esforsa autoridade RAEOA ho Ajénsia Dezenvolvimentu Nasionál Institutu Públiku (ADN,I.P), konsege integra nia proposta ba projetu emerjénsia iha OJE 2026.
Notísia relevante:MOP implementa projetu estrada rurál hamutuk 170 iha tinan ne’e
Entretantu, dotasaun Orsamentu Jerál Estadu (OJE) ba Autoridade RAEOA iha tinan-2026 ne’e, hamutuk $22,788,994.00. Husi montante ne’e, alokasaun ba kategória Kapitál Dezenvolvimentu hamutuk $951,391,00 (4%).
Jornalista: Abílio Elo Nini
Editór: Rafael Ximenes de A. Belo
