OEKUSI, 22 Setembru 2025 (TATOLI) – Autoridade lokál sira iha sub-rejiaun Nítibe rekomenda ba Governu liuhusi Autoridade Rejiaun Administrativa Espesiál Oekusi Ambeno (RAEOA), atu kontinua projetu emejénsia ba reabilitasaun estrada rurál sira iha Nítibe.
Notísia relevante:PM Xanana husu Autoridade RAEOA reabilita estrada rurál sira tenke ho kualidade
Jestór sub-rejiaun Nítibe, Agustinho Afulit, propoin nia rekomendasaun sira-ne’e, iha ámbitu seremónia inaugurasaun projetu bee-moos iha aldeia Kuantua, suku Usitaku, foin lalais ne’e.
“Ami agradese ba autoridade sesante tanba maske mandatu termina ona, maibé konsege lori dezevolvimentu besik to’o ha’u-nia komunidade sira iha área rurál. Ita observa dalan husi Oénunu mai to’o Naktuka agora ateru totál ona, no fasilita movimentu transporte no komunidade sira, maibé foin ami rona fali katak, suspende ona, ne’ebé liuhusi biban ne’e, ami hakarak rekomenda ba autoridade atuál karik bele, kontinua projetu sira-ne’e, tanba estrada sira-ne’e importante ba ami iha knua atu asesu ho seguru,” Agustinho Afulit dehan, iha ámbitu inaugurasaun bee-moos iha suku Usitaku, foin lalais ne’e.
Iha fatin hanesan, Xefe Suku Usitaku, Hilario Babo, kompara antes ne’e viajén husi Nítibe ba Oekusi vila, ho durasaun tempu oras ida, maibé hafoin halo reabilitasaun, viajen menutu 30 de’it.
“Ami agora agradese tebes, tanba kondisaun dalan lahanesan tempu uluk ona, tanba uluk ita la’o motor ka karreta han tempu oras ida, maibé agora minutu 30 de’it. Bainhira ha’u-nia komunidade sira hetan moras, ambulánsia mai to’o kedas fatin, ita kompara karreta labele asesu mai to’o Usitaku liuliu foho, tan ne’e ha’u rekomenda sei bele kontinua, tanba etapa primeiru kompañia halo saluran (kanalizasaun) nahe simentu mai to’o de’it Fatukenfua, entaun ami husu bele kontinua ba to’o mota Oélet,” nia rekomenda.
Notísia relevante:KAFI Oekusi aprova empreza tolu reabilita estrada kilometru 23 liu
Hatan ba rekomendasaun sira-ne’e, Diretór Rejionál Administrasaun, José Tanesib Anunu, rekoñese, antes ne’e Autoridade suspende, maibé nu’udar Governu sei tau matan, nu’udar preparasaun ba podér lokál no desentralizasaun.
“Rekomendasaun sira-ne’e importante, maibé objetivu husi Governu, katak ema hotu tenke asesu ba estrada. Agora iha etapa dahuluk, faze tuirmai bele nahe ona inklui bee-dalan sira atu labele estraga estrada sira, atu fasilidade komunidade sira bele asesu ba eskola, saúde no lori produtu ba merkadu, estrada sira-ne’e mós importante, molok ita ba polítika podér lokál no dezentralizasaun, entaun infraestrutura báziku sira-ne’e tenke prepara ona, entaun Governu sei mantein tau matan ba ida-ne’e,” nia hateten.
Notísia relevante:PA RAEOA konsidera suspensaun projetu emerjénsia 154 iha Oekusi legál
Jornalista: Abílio Elo Nini
Editór: Rafael Ximenes de A. Belo
