OEKUSI, 06 Janeiru 2026 (TATOLI) –Prezidente Autoridade Rejiaun Administrativa Espesiál Oekusi Ambeno (RAEOA) interinu, Herculano de Souza, tersa ohin, hatuur fatuk dahuluk ba konstrusaun sala estensaun tolu ba Eskola Bázika Filiál (EBF) Manunesi iha aldeia Bonemese suku Naimeko sub-rejiaun Pante Makasar.
Kona-ba obra nia kualidade, atuál Koordenadór ZEEDOA ne’e, rekomenda ba empreza konstrutóra kumpre dezeñu BoQ (Bill of Quantity), no husu mós ba komunidade no entidade sira iha suku Naimeko atu koopera ho empreza nune’e bele finaliza tuir termu kontratu.
“Projetu ne’e maske tama kategória emerjénsia maibé husu ba ita atu labele trata obra ne’e nu’udar emerjénsia, katak orsamentu bele duni kategoria emerjénsia maibé kualidade tenke garantidu labele tuir duni kualidade emerjénsia. Tanba ne’e, husu ba kompañia konstrutora atu bele banati tuir padraun dezeñu BoQ, ne’ebé aprovadu, nune’e ita-nia liman fatin ne’e, aban bairua ita-nia oan sira rasik mak sei konta katak obra ne’e kualidade,” nia hateten iha ámbitu seremónia hatuur fatuk inan ne’e.
“Atu obra ne’e la’o ho susesu, presiza ema hotu nia kontribuisaun, tanba kompañia sei garante kualidade, maibé presiza tau matan mós husi komunidade no autoridade lokál sira, nune’e projetu ne’e bele finaliza tuir termu kontratu, atu oferese ba oan sira hodi utiliza ba prosesu aprendizajén,” nia fó hanoin.
Notísia relevante: https://tatoli.tl/2024/12/20/me-lansa-uniforme-eskolar-nasional-pm-prefere-haree-didiak
Iha biban hanesan, Diretór Edukasaun no Solidariedade Sosiál, Vincêncio Cono, esplika, projetu ne’e nu’udar ajudikasaun direita tanba iha tinan kotuk, eskola EBF Manunesi hetan dezastre naturál, nune’e presiza tau atensaun.
“Konstrusaun ne’e iha sala tolu hodi kompleta ona EBF Manunesi nia nesesidade ba futuru. Kompañia konstrutora liuhusi koutasaun ajudikasaun direita tanba kategória projetu emerjénsia, ne’ebé sofre dezastre naturál iha tinan kotuk, tan ne’e eskola referida iha direitu tomak atu tau matan hosi Orsamentu Jerál Estadu 2025 nian, konsidera povu nia osan no tenke serbí duni povu nia nesesidade,” nia hateten.
Xefe Suku Naimeko Marcos Liu, agradese tanba bele responde ona EBF Manunesi nia preokupasaun ne’ebé durante ne’e enfrenta.
“Agradese ba autoridade nia apoia tanba eskola ne’e presiza aumenta sala. Maibé, ha’u mós hakarak hato’o nia rekomendasaun hanesan autoridade suku, ba obra hotu, bainhira projetu ruma tama iha suku, presiza surat-tahan hanesan koñesimentu tama mai suku, tanba área ne’e tama suku Naimeko nian, nune’e ha’u labele sai fali bainaka ba obra ne’ebé konstrui iha suku laran, katak obra ne’e Governu nian atu apoia koopera hamutuk ho komunidade sira-ne’ebé hela besik liu-liu eskola,” nia rekomenda.
Autoridade komunitária ne’e mós promete sei hamutuk ho komunidade sira no autoridade lokál sira iha aldeia Bonemese hamutuk ho manorin sira iha EBF Manunesi sei koopera ho empreza konstrutora, nune’e projetu referidu konkluídu tuir durasaun tempu ne’ebé determina ona, tanba obra ne’e mak sei fasilita oan sira atu asesu edukasaun ho seguru ba prosesu aprendizajen.
Notísia relevante: https://tatoli.tl/2024/11/06/kualifika-rekursu-umanu-sai-prioridade-ba-edukasaun-oe-cusse-iha-2025
Entretantu, konstrusaun ne’e implementa husi empreza lokál Suni-Oni Unipesoál Lda ho valór kontratu rihun $79,946.56 verba ne’e Autoridade RAEOA aloka husi Orsamentu Jerál Estadu (OJE) 2025 nian ho durasaun serbisu fulan tolu.
Jornalista: Abílio Elo Nini
Editór: Rafael Ximenes de A. Belo
