OEKUSI, 28 Outubru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) ne’ebé reprezenta husi Koordenadór Zona Eekonómia Espesiál Dezenvolvimentu Oekusi Ambeno (ZEEDOA), Erkulano de Sousa, hatuur fatuk-inan ba konstrusaun postu saúde Lamasi iha suku Bene-Ufe, sub-rejiaun Nitibe.
Konstrusaun postu saúde ne’e, ezekuta hosi empreza Jmelo Unipesoál Lda no nia medida 15×11 ho valór kontratu $85,881.81 ho durasaun serbisu durante fulan neen.
Notísia relevante:Autoridade RAEOA aloka rihun $85-resin harii postu saúde iha Lamasi Nítibe
Iha biban ne’e, Koordenadór ZEEDOA enkoraza kompañia atu ezekuta projetu referidu garante kualidade no aselera serbisu ho responsabilidade, nune’e komunidade sira iha Lamasi bele utiliza ona iha inísiu 2026.
“Ita-nia esperansa ba kompañia, sei ezekuta projetu ne’e, tenke serbisu ho kualidade, tanba ne’e ita serbisu ba ita-nia rai Oekusi no ita-nia komunidade rasik, tanba ne’e tenke serbisu ho fuan no kumpre dezeñu ne’ebé iha no tenke kumpre kontratu ne’ebé iha katak serbisu bazea durasaun konstrusaun durante fulan neen,” nia hateten iha Lamasi Nítibe.
Nia mós rekomenda ba ba Konsellu-Suku Bene-Ufe no komunidade sira, atu koopera no serbisu hamutuk ho kompañia, nune’e bele aselera serbisu ho kualidade no lalais.
Notísia relevante:Autoridade RAEOA planu harii sentru saúde iha Naktuka
Jestór sub-rejiaun Nítibe, Agustinho Afulit, agradese, tanba antes ne’e, komunidade sira iha aldeia Lamasi, mak rekomenda direta ba Primeiru-Ministru, Kay Rala Xanana Gusmão, iha ámbitu vizita diálogu iha aldeia Lamasin.
“Ha’u lori komunidade sira-nia agradese ba Governu, tanba uluk abitante sira iha Lamasin mak rekomenda direta iha vizita Avo Nana. Neʼebé, horsehik ha’u akompaña, anúnsia ona rezultadu tenderizaun (konkursu), entaun espera tempu-badak bele hahú kontrusaun ona, tanba durante ne’e, komunidade atu halo tratamentu, tenke la’o loron ida tomak mai iha sentru saúde Baoknana no balun ba Citrana, maibé tenke ba dadersan lorokraik mak fila tanba do’ok,” nia orgullu.
Jornalista: Abílio Elo Nini
Editór: Rafael Ximenes de A. Belo
